Kumin nipui transfer bazar chhung khan Manchester United aia Etihad Stadium pan thlangtu Elliot Anderson chuan Manchester City a zawm hnuah Old Trafford club chu a ṭawngel zui a, Pathiannia Manchester derby hmasa ber khelh tur boruak chu a tisa zual hle.

Anderson hi kumin nipuia United-in an midfield thawmṭhat nana an lak luh tum ber zinga mi a ni a, season liam ta tawp lama Nottingham Forest tana Old Trafford-a a rawn inlan ṭum khan United hotute mit a lo la tawh hle a ni. Mahse a man atana Forest phut £116million chu United tan chuan a to mah mah a, chu mai bakah he England international hian City zawm a thlang zawk bawk a ni.

City fan-te rilru lak tumin he midfielder hian club official website-a an kawmnaah United hi a thamlo zui a, City chu "Manchester-a lal (kings of Manchester)" tiin a ko hial a ni. Anderson chuan a hriat theih chin zawngah chuan City chu khawpui chhung inkhelhah chungnung zawk an nih char char thu a sawi bawk a, hei hian Pathiannia Old Trafford-a an inhmachhawn tur boruak chu a ti-alhhring zual hle a ni.

He ṭawngkam hi United head coach Michael Carrick chuan a pawm loh zawng tak a ni a. Carrick hian January thla khan Pep Guardiola-a City lakah a match hmasa ber a lo chakpui tawh a, player a nih lai pawhin derby vawi 31 a khelhah vawi 17 ngawt a chak a, vawi thum chiah a tlawm a nih kha.

Anderson-a thusawi chungchang an zawh khan Carrick chuan, "Kha ṭawngkam kher kha chu ka hmang miah lo ang, ka pawm lo hrim hrim," a ti. Mahse, City te ang tluk tura United-in hma an sawn chhoh dan chu thlirzau tak chungin a sawifiah zui thung a ni.

Carrick chuan, "Thil awmdan ka hrethiam e. Champions League kan luh leh takah hian kan laka beiseina a san chhoh dan hi thil lawmawm tak a ni. Thla tlemte liam ta nena ngaihtuah chuan tunah chuan thil tam tak kan lakah phut a ni tawh a, Champions League-ah kan inlan leh tawh miau a ni.

"Hei hian hmalam kan pan zia a tilang a, inelna tawp lam thleng thei tura kan inbuatsaih a ngai a ni. Kan dinhmun kan in-hria a, tun hnaia kan dinhmun aṭangin inngaitlawm tak leh a nihna dik tak pawm chungin kan kal a, hma sawn zel a, cho chhuak thei tura dinhmun ṭha zawk neih kan duh a ni.

"A awmzia chu kan thei lo ang a, kan ti lo ang tihna a ni lo. Beiseina kan la nei a, kan inringtawk a, hetiang dinhmuna awm tur hi kan ni tih kan hria, mahse thil awmdan pumpui hi ka hrethiam a ni," tiin a sawi.

City-in tlar laili thuam nan £326m zet an senna kawnga Anderson-a a tel ve chu he match ti-hmuhnawmtu pakhat a ni dawn a. City-in Anderson, Enzo Fernandez leh Ayyoub Bouaddi te an lakluh laiin, United pawhin tlar laili thuam nan midfielder pathum manah £155m lai an seng ve bawk a ni.

Brighton aṭanga an lak thar Carlos Baleba chuan debut a la siam lo a, mahse Andrey Santos leh Youri Tielemans te erawh an tlangnel chho hle tawh a; Aston Villa aṭanga £35m-a an lak Tielemans phei chu match thum liam taah a che ṭha hle.

Midfield-a Tielemans, Santos, Kobbie Mainoo leh Mason Mount te neih chungchang Carrick chuan sawiin, "Ball khawih thiam, hma lama ball nawr kal thei vek an ni a; pass hmangin emaw, tlanpuiin emaw dribble hmang pawhin hma lam an panpui thei vek a ni. Hetiang player squad-a neih hi a hahdamthlak hle a ni.

"Youri hi a insiamrem ṭha em em a, Andrey pawh a ṭha hle. Mason pawh a hma aia danglam deuhva khel tura kan tih hian awlsam takin a ti thei a ni tih a lang chiang hle. Youri-a chungchangah phei chuan match tinah hma a sawn zel a, an inhmufuh chho tial tial tih a hriat theih a ni," a ti.