Manchester United midfielder hlui Ander Herrera chuan an teammate hlui Juan Mata hnen aṭangin Bruno Fernandes-a mize ṭha leh a theihna chungchang a lo hriat tawh thu sawiin, ani ngei pawhin he Portuguese midfielder hi a ngaisangin a dah sang hle tih a sawichhuak.
United defender hlui Rio Ferdinand-a podcast 'Rio Ferdinand Presents'-a an inkawmnaah, kum 37 mi Herrera chuan tun hnaia Melbourne Victory tana khel tawh Juan Mata nena an inbiakna chungchang hi a phawrh a ni. Mata hian kum 2022 thleng khan Old Trafford-ah hun hmangin Bruno Fernandes nen hian an lo khel dun hman a, khelmual pawn lam thleng pawhin ṭhian inkawmngeih tak an ni chho zui bawk.
Herrera chuan heti hian a sawi: "Juan hi football khawvela ka ṭhian ṭha berte zinga mi a ni tih in hria ang a. Anni pahnih (Bruno leh Mata) hi an innelin inlaichinna ṭha tak an nei a, Juan-a hnen aṭanga ka hriat dan chuan Fernandes hi mi ṭha chungchuang tak, mi danglam bik a ni.
"TV aṭanga ka thlir chang pawh hian, he club tana a thil lo tih tawh zawng zawng avang hian a lakah zahna lian tak ka nei a ni. Club hi chhuahsan thei a ni a, mahse hun harsa ber lai pawhin hnungchhawn lovin a hmachhawn ngam tlat a, fak a phu tak zet a ni—fakna tam tak a phu a ni," tiin a sawi.
Tun hnaia Real Zaragoza tana khel mek, Athletic Bilbao leh Boca Juniors tana lo khel tawh bawk Herrera hian, tun dinhmuna United first-team squad zingah hian khelmuala khelhpui a chak ber chu Fernandes a nih thu a pha lo bawk.
"Kei chuan Bruno ka thlang ang," tiin Ferdinand-a hnenah chuan a sawi a. "A lakah zahna lian tak ka nei a, ka ngaisang hle bawk. Ka aia naupang zawk ni mah se ka dah sang em em a ni. Ka ngaihdan chuan ani chu hruaitu (leader) dik tak a ni. Kum tam tak leh season tam tak chhung chu Manchester United hi a kokiah a pu a ni ber mai.
"A chang chuan a mal ṭan ti dawn lo ila, club chanchin leh a hlutna zawng zawng hi a kokiah a innghat ṭhin. Hun harsa tak karah pawh a awm reng a, Spain rama kan sawi ṭhin dan takin, a hmaah a ding ngam zel a ni. Hun harsaah ball a dil ngam reng a, goal a khung a, midang khung tur a siamsak a; tlawm hnuah pawh media hmaah ding chhuakin thu a sawi ngam ṭhin. A lakah zahna lian tak ka nei a, khelmualah khelhpui thei ila ka ti hle mai," tiin Herrera chuan a sawi belh bawk a ni.
Louis van Gaal-a hun laia United zawmtu Herrera hian Old Trafford-ah season nga hun hmangin, 2019 khan a contract a zawh hnuah Paris Saint-Germain a pan a. United-a a awm chhung hian Europa League, FA Cup leh League Cup nomawite a lo chawi hman a nih kha. Fernandes erawh hi chu kum 2020 January thla khan Sporting CP aṭangin £47m-in United hian an lalut a ni.
Sir Alex Ferguson-a chawlh hnua United player lakluh zingah Fernandes hi an chet ṭhatpui ber zinga chhiar a ni a, Erik ten Hag-a hnuaiah captain niin, FA Cup leh League Cup te a chawipui tawh bawk. Tunah hian head coach Michael Carrick-a hnuaiah pawh Portuguese midfielder hi team tana mi pawimawh ber a la ni chhunzawm zel a ni.
