Thawhtanni khan Carrington-a Manchester United U21-te friendly match khel lai chu ruah sur hnuaiuh Michael Carrick chuan a thlir a, hetih lai hian chief executive Omar Berrada leh director of football Jason Wilcox te chuan ani hrem emaw ban mai turin a hma hun an ngaihtuah mek a ni. Bournemouth laka an tlawm chhiat hnuah match riat (8) ngawt chak lohna nei mah se, Ineos lamin thutlukna an siam muang bawk nen, Thawhlehni chawhma khan Carrick hi ban lohin hun pek belh an ti ta zawk a ni.
Hemi hnu Ningani khan a hma hun siamṭhat nana hun pek a nih hnuah Carrick hi a vawikhat nan chanchinbumite hmaah a rawn ṭawngchhuak a. Carrington-a inbiakna khauh tak tak (robust conversations) a awm em tih an zawhna chu chhangin, "Sawi tur a chiang hle a ni. Keimah leh player-te inkarah pawh nise, keimah leh Jason (Wilcox), Omar (Berrada) emaw club neitute inkarah pawh nise, inbiakna hi a nuam pur vek bik lo a ni," tiin a sawi. "A harsa chung pawhin thudik tak a ni ṭhin a, hei hi hma kan sawn chhoh zel nana kan mamawh tak chu a ni," a ti bawk.
Carrick hi mipuite hmaah zaidam tak anga lang ṭhin ni mah se, a ruka mawhphurhna la ngam leh player-te laka duhthawh tak a nih thu tarlan a ni a. A puitu (assistant manager) Steve Holland pawh mi tlang tak, tlawm ngai mai mai lo leh dressing room-a player-te zah rawn a ni bawk. Carrick chuan dressing room-a hruaitu (leaders) te chu team dinhmun siamṭhat dan tur chungchangah an ngaihdan a lo zawt ṭhin tih tarlangin, an ngaihdan a ngaihpawimawh em em thu a sawi bawk a ni.
Bournemouth an hneh loh hnu khan tunnel-a a luh laiin fan-te'n Carrick hi an kut an lo bentawk (applauded) a, mahse player-te erawh lungawilohna lantirin an lo au chhe (booed) thung. Hemi chungchang sawiin Carrick chuan, "Thudik tak sawi chuan rilru a buai nuai a ni," a ti. "Fan-te aṭanga zahna leh inzawmna hmuh chu ka tan a hlu hle a. Mahse khatiang boruak kha a nuam miah lo, player-te nen 100% in a hmun khatah kan awm ho a ni tih ka hriat avangin ka hlim bik hauh lo. Player-te hnenah pawh inṭhen hrang anga awm a nih ka duh loh thu ka hrilh a ni. Anni hi ka team an ni a, ka club a ni bawk a, kan ṭangtlang vek tur a ni," tiin a sawi.
United hian tun hnai match 8-ah hnehna an chang tawh lo a, player-te inrintawkna (confidence) a hniam hle. Mahse Carrick chuan inrintawkna hi thil thleng thut thei a nih thu sawiin, "Inrintawkna hi sport-a thil ropui tak a ni a. Match khat, chakna khat emaw result ṭha pakhat lek pawhin inrintawkna a rawn thlen leh zung zung a ni. Season tir lamah pawh kan lo hmu tawh a, inrintawkna hi a lo kir leh vat thei a ni. Chu chuan hmalam min nawrtir a, thil thleng thei a ni tih min rin tlat tir ṭhin a ni," tiin a sawi zui a ni.
