Manchester United captain hlui, club chanchina langsar ber ber zinga mi Bryan Robson chuan Stretford End-a supporters-ten "STANDARDS" tiha banner an pho chhuah chu hrehawm a tih thu sawiin, mipuite hmaa head coach Michael Carrick-a tactic sawiseltu tunhnaia captain Bruno Fernandes chu a chhuahchhal ta.
October 21-a Como laka 4-1 ngawta United an tlawm hnu khan, captain Bruno Fernandes chuan man-to-man press an hmang lo chu mipuite hmaah puitling tak lo zawk in Carrick-a thutlukna lakah zawhna a lo siam a ni. He a ṭawngchhuah hnu hian, Bournemouth laka 3-0 a an tlawm ṭum khan Portugal international hi bench-ah dah a ni a, he match chhung hian fans-te chuan Robson, Roy Keane leh Eric Cantona-te hmel lanna banner "STANDARDS" tih inziat chu an pho chhuak ta a ni.
Hemi hnu hian Carrington training ground-ah Carrick leh Fernandes-te hian boruak fel lo a awm loh nan inbiakna an nei a, Portugal international hian club tana a inpenna leh a inhuamna chu a nemnghet a ni. Head coach Carrick pawhin Chelsea an tlawh hmain Fernandes hi Manchester United captain a la nih zui zel tur thu a nemnghet tawh bawk.
The Daily Mail nena an inalhnaah, captain ropui Robson chuan player-te chuan Manchester United aiawha khelmual luh a nih tawh chuan eng tianga sang nge beisei a nih ṭhin tih zawng zawng chu luhtirh aṭangin an hriat nghal a ngai a ni tiin a sawi. "Thil tihdan tur dik (standards) chungchangah hian Manchester United-ah chuan a sang ber kengkawh reng hi an phut ṭhin a, chhuat i rah ṭan aṭangin chu chu i hre nghal a ni," tiin a sawi.
Manager hlui Ron Atkinson-a'n heng beiseinate hi a hrilh fiah vek ṭhin thu Robson chuan a sawi a, mahse amah hrim hrim pawhin a tir aṭangin a lo hre sa tawh reng a ni. Mimal aia team hlawhtlinna leh United tan thawhrim a pawimawh zawk thu sawiin Robson chuan, "Sir Alex Ferguson-a zirtirna leh thutluknate hi mipuite hmaah ka sawisel ngai miah lo ang," tiin he Portugal midfielder-a chetdan hi a sawisel thawt thawt a ni.
Robson hi kum 1981 khan West Bromwich Albion aṭangin British record fee £1.5 million-in United a zawm a. Red Devils tan hian match 461 inlanin goal 99 a khung hman a ni. Old Trafford-a a awm chhung hian league title pahnih, FA Cup pathum leh European Cup Winners' Cup nomawite a chawi a ni. Hliam avang leh midfielder naupang zawkte an rawn ṭhanchhoh tak avangin inlanna hun a hmu tlem tial tial a, kum 1994 khan Middlesbrough zawmin player-manager hna a chelh zui ta a ni. A hnuah Bradford City, West Bromwich Albion, Sheffield United leh Thailand-te enkawlin, tunah hian Manchester United club representative hna a chelh mek a ni.
