Manchester United chuan an tlarhnung veilam (left-back) thuam chak ngei tumin Juventus defender Andrea Cambiaso chu lakluh an ngaihven mek nia report a ni.

INEOS hruaina hnuaia United hian January transfer window inhawng turah hian hmun pawimawh tak mai left-back hi thuam chak hram an tum a, head coach Michael Carrick-a squad-ah he position bik atana chhawr theih tur rintlak an indaih lo hle a ni.

Season liam ta khan Luke Shaw chuan Premier League match zawng zawngah bul a ṭan vek a, mahse he English defender hi a hliam hlui bawkin a tlakbuak leh tak avangin United tan buaina lian tak a tling leh ta a ni.

Left-back bik chhawr tur nghet leh rintlak an neih tlem avangin United hian he hmunruak hi a rang lama hnawhkhat turin hma an la mek a. Mahse, Juventus-a a chet ṭhat avanga hmingthang chho mek Italian defender Cambiaso hi Europe club lian dangte pawhin lakluh an duh ve hle avangin United hian an elpui lian continental club-te nena invelh an hmachhawn a ngai dawn a ni.