Manchester United pre-season-a che langsar em em Shea Lacey chuan tun season regular campaign chhung hian a vawi khat nan first-team bul ṭan theihna hun remchang a nghak mek a ni.

Kar liam ta khan Champions League match-ah Sabah lakah bench aṭangin Lacey hi a rawn inlan tawh a. He tleirawl hian inkhel tawp dawn lamah Harry Amass nen minute 15 chhung hun an chang dun a nih kha. Brighton nena Carabao Cup match an khelh turah player inthlak kual (rotation) neih a nih rin a nih avangin, Lacey hian a vawikhatna atan bul a ṭan theih ngei a inbeisei a ni.

Brighton nena an inhmachhawn hma hian, Lacey chuan social media-ah Old Trafford khelmuala a awm lai thlalak dahin 'heart emoji' nen a post a, club tana a inpek zia chiang takin a tarlang a. Hei hi Manchester United chhungrila boruak thleng mek karah chuan chhanna fuh tak a tling a ni.

Rawlthar theihna ngah tak JJ Gabriel chuan first-team debut a siam theihna tura training neih chu a hnawl a, a aiawhtute (advisors) chuan hmun danga insawn zawk turin an duh thu an thlen bawk. Manchester United chuan he buaina hi siamṭhat tumin ṭan la mek mah se, club tan erawh beisei a bo hle niin a lang a, Gabriel hi Real Madrid leh Barcelona te nen pawh sawizawm a ni mek bawk.

Hetiang dinhmun buai tak a awm lai hian, Shea Lacey-a'n United tana a inpek zia a pholan hian Brighton laka Old Trafford-a a inlan huna fan-te lawm a hlawh zual ngei a rinawm a ni. Kum li chhung zet player ropui ni tura beisei a nih hnuah dawhthei takin a hun remchang a nghak a, hei ngei hi United-in an academy rawltharte laka an hmuh duh ber chu a ni.

Kar liam ta mai pawh khan Gabriel-a aia dah chungnun a nih zia Lacey hian a pholang tawh a. Gabriel chu UEFA Youth League-ah a khelh laiin, Lacey erawh chuan senior team tan Champions League-ah debut a siam a ni. Gabriel-a aiawhtute chuan Sabah lakah he rawlthar hi khel ve tura beiseina an lo neih laiin, squad-ah chuan Lacey hi a chungnung zawk tih a chiang hle. Pre-season chhung zawng pawhin Lacey hian inkhelhna hun a chang hnem zawk reng a ni.

Tun hnaiah Leicester laka Under-21 match an khelh ṭum pawhin, Lacey-a'n minute a neih theih nan Gabriel chu bench-ah dah a lo ni tawh a. Lacey hian goal hnih khung nghalin danglamna a thlen a, Gabriel-a'n bench aṭanga rawn lutin goal khat khung ve mah se kha ni kha chu Lacey-a ta a ni chiang hle.

First-team khel tura inpeih zawk nia ngaih a nih avangin Brighton lakah pawh Lacey hian khelmual a luhchhuah ngei beisei a ni a, Gabriel erawh khelmual pawn aṭanga thlirtu mai a nih a ngaih hmel ta a ni.