Pathianni liam taa Manchester derby-a beisei loh taka an tlawm hnuah, zanin hian Manchester United chuan Carabao Cup third round inkhel atan Old Trafford-ah Brighton & Hove Albion an mikhual leh dawn ta. Head coach Michael Carrick-a naute hian Fabian Hurzeler-a enkawl Brighton lakah hian hnehna chan let leh ngei an tum ruh hle dawn a ni.
Squad dinhmun thlir hian Carrick chuan City an hmachhawn ṭuma a player hman theih ang tho kha Brighton lakah hian a chhawr leh thei tura ngaih a ni. Left-back Luke Shaw chu khelmuala inlan leh thei dinhmunah a ding hnai ber a, mahse Carrick-a'n thutlukna a siam hmain a dinhmun hi a enfiah hmasa phawt dawn a ni. Hetih lai hian Amad chu a inlan thei dawn lo tih chian a ni tawh a, defender Matthijs de Ligt pawh a hnungzang hliam na tak aṭanga a la damchian theih loh avangin a la chawl rih dawn bawk a ni.
Brighton aṭanga an lakluh thar midfielder Carlos Baleba pawh a club hlui hmachhawn tur hian a taksa a la fit tawk lo a, international break zawhah chauh United tana a debut a siam theih a beiseiawm. Carrick hian squad rotation a hman theih avangin player naupang ṭhenkhat - JJ Gabriel, Tynan Thompson leh Harry Amass te hnenah hunṭha a pe maithei bawk a ni.
Thla khat liam ta vela ruahmanna an lo neih ang em emin Carrick hian squad siksawi hnem kher lo mah se, derby-a an tlawm hnuah team boruak a rit chho mek a, result ṭha an mamawh takzet avangin naupang tam tak chhawr chu a huphurhawm maithei a ni. Heti a nih rual hian Pathiannia Craven Cottage-a Fulham luhchhuah tur an nihna chu chak ngei ngei ngai match a nih miau avangin, he cup tie-ah hian inthlak danglamna tlem chu a awm ngei a rinawm.
Chuvang chuan goalkeeper Karl Darlow chuan United tana a debut a siam theihna hun remchang a awm a, tlarhnungah Leny Yoro leh Ayden Heaven te pawh bul ṭantir theih an ni ang. Mazraoui chu right-back-a a khelh theih nan Harry Amass pawh tlarhnung veilamah chhawr theih a ni bawk. Midfield-ah chuan nipui laia lo inkawp ṭha tawh Andrey Santos leh Mason Mount te chu a bul aṭanga intirh an phu hle a, captain Bruno Fernandes hahchawlhtirin Matheus Cunha chu nambar 10 hmunah chhawr theih a ni ang. Tlarhma laiah striker Benjamin Sesko intirhin, mual sir lamah Shea Lacey leh Tynan Thompson te bul ṭantir theih an ni bawk.
Brighton hian Old Trafford an tlawh hnuhnung vawi nga zinga vawi li (4) ah hnehna an lo chang tawh a, chuvangin Carrick hian zuam ngawt chi an ni lo tih a hria. Premier League chu an ngaih pawimawh ber ni mah se, a zawnin season hnih chhung Carabao Cup-a an match hmasa bera United an tla a nih chuan sawiselna a nasa zual hle thei a ni. Chuvang chuan Senne Lammens, Harry Maguire, Bruno Fernandes, Bryan Mbeumo leh Marcus Rashford te ang player rinrawl ṭhenkhat chu bul ṭantir an la ngai ve tho maithei bawk a ni.
