Carabao Cup inkhelah Manchester United chuan goal hnih faia hma an hruai tawh hnuah Brighton & Hove Albion lakah 3-2 in an tlawm a, inelna aṭangin an tla zui ta a. He inkhela Brighton-in an goal hmasa ber an khung hma chiaha thil thlengah khan foul a awm lo tih tarlan a ni a, United head coach Michael Carrick-a'n referee thutlukna a sawisel chu a dik lo zawk a, referee thutlukna siam chu a dik zawk niin referee hlui chuan a sawi chhuak a ni.

Inkhel ṭan aṭanga minute 10 chhung lekin Shea Lacey leh Mason Mount te chuan United tan goal an khung a, 2-0 in hma an hruai nghal der a ni. Mahse, first-half injury time-ah Charalampos Kostoulas chuan Brighton tan goal a rawn khung a, hei hian Seagulls tan beiseina thar siamin second-half-ah Pascal Gross leh Maxim De Cuyper te chuan goal an khung belh leh a, Brighton hian 3-2 in hnehna an chang ta a ni.

Carrick chuan Kostoulas-a'n goal a khung hma khan United tan free-kick pek awm a nih thu a sawi a, referee thutluknaah a lungawi lo hle. Halfway line bulah Benjamin Sesko chuan Olivier Boscagli leh Malick Yalcouye te a intawhbuai pui hnuah ball a chan a. Khelmual sir aṭangin Carrick chuan a ban pharin foul a nih thu referee hnenah ngen mah se, engmah hremna pek a ni lo. Hemi hnu hian Jaouen Hadjam chuan ball ṭha tak hma lamah a vawrh phei a, Kostoulas chuan kil chep tak aṭangin goalkeeper Karl Darlow chu a pet khum ta a ni.

He thil thleng chungchangah hian Premier League referee hlui Keith Hackett chuan khelmuala player pahnih inpalpalh satliah (coming together) chauh a nih thu leh, referee Farai Hallam-a thutlukna siam chu a dik zawk niin a sawi. Football Insider hnenah Hackett chuan, "Football hi chu tharum thawh telna (contact sport) a ni a, he thil thleng kan en pawh hian player pahnih intawng palh satliah a ni mai. Foul a awm lo! Khelh chhunzawm tur a ni a, referee [Farai Hallam] hian thutlukna dik a siam a ni," tiin a sawi.

Match zawhah Carrick chuan an dinhmun ṭha lo chu siamṭha leh thei an nih zia a sawi a. Carrick chuan, "Player ṭha tak tak kan nei a, tun kar hnih khat chhung hi kan hun a ṭha tawk lo hle a, tuna kan dinhmun hi a nuam lem lo khawp mai.

"Mahse chu vang ngawt chuan football match danga chak leh vat theih a ni lo tihna a ni lo. Player-te hian eng ang theihna nge an neih tih leh team ang pawhin kan theihna chu kan lo pholang tawh ṭhin a ni.

"Thil liam ta chuan awmzia a nei thui lo va, a hnu leha thil thleng tur hi a pawimawh ber fo ṭhin. Tun huna i tih leh a dawt chiaha i tih turte chu kan hmachhawn tur lian ber chu a ni a, he hmunah hian a awm reng ṭhin a, a awm zel bawk ang.

"A pawimawh ber chu a dawt leha i thiltih leh dinhmun ṭha leh ṭha lo kan hmachhawn dan hi a ni. He hun harsa hi kawng dik leh ṭha taka kan paltlang a ngai a ni," tiin a sawi bawk.