Carabao Cup aṭanga Brighton laka Manchester United an tlakna inkhelah khan thil lawmawm hmuh tur a tlem hle a, mahse an zinga hmuh nuam ber chu a vawikhat nana bul ṭan a, goal khungtu rawlthar Shea Lacey a ni.
Mahni theihna liau liau hmanga solo goal mawi tak a khung hnuah Lacey hian United badge a fawp a, hei hi an hun nghak peih lo academy naupang dangte tana thuchah pawimawh tak a kawk bawk. Kum 19 mi lek ni mah se, Lacey hi first-team-ah player pawimawh tak a rawn ni chho ṭan a, a khelhpuite zah a hlawh chho nghal hle a ni.
A theihna pholan bakah, an captain Bruno Fernandes-a mize neih ang chiah khelmuala hruaitu (leader) nihna a pholang zui bawk. United tan vawi sarih chiah a la inlan a, vawikhat chiah bul a la ṭan a, goal khat a la khung chauh a ni. Mahse a theihna, a nungchang leh a thawhrimna avang hian club chhungah mi zawng zawng ngaihsan a hlawh chho der tawh a ni.
Lacey-a chet ṭhat em avang hian a ṭhiante kaihhruai theihna dinhmun a chang chho mek a, second-half ṭan hma chiah khan striker Benjamin Sesko nena an inbia lai chu ITV camera-ah fiah takin hmuh a ni. Hetah hian Lacey chu Fernandes-a ang chiahin a khawsa a, Sesko hnenah an tihsual lai leh second half-a a mamawh dan te chu a hrilhfiah mawlh mawlh a ni.
Hei hian Lacey chu a team-mate ten an zah hle tih a tilang a, a ngaihdan sawichhuak ngam tur khawpin a inrintawk bakah, Fernandes-a chet dan aṭangin thil a lo zir ve ṭhin tih a hriat theih a ni. Sesko tan pawh hetianga academy tlangval naupang zawkin thurawn a pe chu inngaitlawm taka a lo ngaithla thei chu fakawm tak a ni a, a aia chungnung zawk anga inngaihna a nei lo a ni. Heng player pahnih te hi hun lo la kal zel turah United tan an khelhdun tam chhoh dawn avangin, hetianga inkungkaihna ṭha an nei chho nghal hi thil lawmawm tak a ni.
Kum 19 a nih laia khelmuala hruaitu zia a pholang thei a nih chuan, kum 23 emaw 24 a nih hunah chuan eng ang taka puitling nge a nih ang tih chu ngaihtuah tham tak a ni. Lacey ang hian Kobbie Mainoo pawh Carrington academy chhuak zinga United hruaitu ni chho mek a ni a, entirna ṭhalo awm ṭhin mah se Carrington chuan footballer ṭha mai bakah mihring puitling tak an chherchhuak thei tih a tichiang a ni.
Match an khelh hmain head coach Michael Carrick chuan he rawlthar chungchang hi sawiin: "A rawn puitling deuh tawh a, tawnhriat a ngah chho deuh bawk a, player naupangte laka kan beisei ang ngeiin a rawn ṭhang lian chho mek a ni. Hunṭha a neih theih nan thil dik tak a ti zel a, chuvang chuan zanina a khel tur hi ka nghakhlel hle a ni," tiin a lo sawi tawh a ni.
Lacey hi United mizia dik tak pholangtu a ni a. Brighton laka a khelh dan khan a phurawmin a thawhhlawk zia a pholang chiang hle. A thawhrimna leh a thluak ṭhatna hmang hian mual dinglam sirah Bryan Mbeumo pawh a chuhpui thei hial dawnin a lang a, Fulham an hmachhawn hunah pawh starting lineup-ah a inlan zui a rinawm hle a ni.
