Pathianni tlai lamah Manchester United chuan Old Trafford-ah Bournemouth an mikhual dawn a, team pahnih aṭangin player 9 ngawt an inlan thei dawn lo a ni. Inelna hrang hrangah a zawnin match sarih chhung chak nei lova an awm tak avangin, United head coach Michael Carrick-a lakah hleihluak taka chak mamawhna pressure a sang hle.
Nilaini zan Champions League match-ah Cesc Fabregas-a enkawl Como laka 4-1 ngawta an tlawmna kha head coach tan chuan harhchhuahna (wake-up call) a ni hrim hrim a, Italian club hian match chhung zawng inkhel an thunun hneh hle a ni. Pathianni dar 7:30 PM (UK-a tlai dar 2:00) a inhmachhawn tur he match a thlen hma hian Red Devils te hi Premier League table-ah 13-na dinhmunah an awm mek a, match sarih an khelh tawhah vawikhat chiah an la chak a ni.
Marco Rose-a naute Bournemouth pawhin tun season bul ṭannaah harsatna an tawk ve mek a, match sarihah vawikhat chiah chak ve bawkin, United aiin point khatin an hniam a, 15-na dinhmun an luah mek a ni. Ningani zan Europa League match-ah AC Milan 3-0 ngawta an hneh tak avangin Old Trafford pan tur Cherries te hian inrintawkna sang tak an rawn vawrh chhuak ngei dawn a ni.
United squad-ah hliam hmangin harsatna a thlen hma em avangin he match hi Carrick-a tan a khirh lehzual dawn. Kar tir lamah Carrick-a'n Benjamin Sesko-a dinhmun a puan tur thu sawi mah se, Zirtawpnia chanchinbumite a kawmna a ṭan tirha thu a sawiah he Slovenian striker hliam chungchang hi a sawi zui lo a ni. Sesko hi a chuktuah hliam (shin injury) avangin a chawl mek a, a rawn kir leh hun tur hriat a la ni lo.
Kobbie Mainoo pawhin muscular issue avangin he match hi a hmaih dawn a, ni 10 vel a chawlh a ngaih avangin Chelsea nena an inkhelh hunah a rawn kir leh hman beisei a ni. Full-back Luke Shaw pawh hliam hriat chian loh vangin November thla tir hma chuan a rawn kir theih a rinawm loh a. Patrick Dorgu pawhin ram tana a khelh ṭuma a malpui (thigh) hliam avangin match a hmaih dawn bawk. World Cup-a Uruguay tana a khelha ACL hliam na tak tuar Manuel Ugarte phei chu kum 2027 hmain khelmual a rawn rah leh a rinawm rih lo a ni.
Chutih rualin chanchin lawmawm hret awmin, mualneitu United hian player engemaw zat an mualah an lo lawm lut leh thei dawn a ni. Como laka inlan lo Lisandro Martinez chuan fit thlapin Bournemouth a hmachhawn theih beisei a ni a, a hliam tenau (hip knock) avanga chawl Marcus Rashford pawh a rawn kir leh thei ang. Hriselna lama harsatna neih avanga match pahnih chawl tawh rawlthar Ayden Heaven pawh first-team training-ah a kir leh tawh tih Carrick-a'n MUTV hnenah a nemnghet bawk.
Hliam avanga buai bik chu United chauh an ni lo. Bournemouth pawhin Alex Toth chu a malpui (hamstring) hliam avangin kar hnih chhung an chhawr thei dawn lova, malpui hliam nei bawk Alex Scott pawh thla thar lamah a rawn kir leh ang. Julian Araujo-a rawn kir leh hun tur a la chiang lova, Veljko Milosavljevic pawh November thlaah chauh a fit dawn avangin Old Trafford-ah a inlan dawn lo. Eli Junior Kroupi chu bench-ah awm beisei ni mah se, Theatre of Dreams-ah hian bul a ṭan a rinawm rih lo a ni.
