August 2025 aṭanga Formula 1 Grand Prix-a pole position la tawh lo Ferrari tan nghah a la ngai zui zel a, Inrinni khan United States Grand Prix qualifying-ah pole la tura rinkai ber ni chungin Charles Leclerc leh Lewis Hamilton te chu top three pawn lamah an tla leh ta a ni.

Texas khawpui Austin-a qualifying an neihah hian, pole position la tura rinkai ber ni chungin Ferrari driver pahnihte hi palina leh panganah an inhlangkai ṭawk a, tlarhma (front row) aṭanga tlan theihna hunṭha an bawhpelh avangin Charles Leclerc leh Lewis Hamilton te chu an beidawng hle.

World champion vawi sarih ni tawh Hamilton chuan khelmuala Ferrari chakna tla hniam ta thut chu "Chhun leh zan anga danglam hlak a ni" tiin a sawi chhuak a, chhanna zawn ngaihna pawh a hriat loh thu a sawi hial a ni. Kimi Antonelli-a khalh Mercedes leh Red Bull motor pahnihte umphak loh chhanah hian Leclerc leh Hamilton te hian ngaihdan inang chiah lo nei mah se, tyre tihlum vat theih lohna (tyre warm-up weakness) leh hun remchang chhawr ṭangkai hleih theih lohna chu an tlahniam leh ta chhan bulpui ber nia hriat a ni.

Zirtawpni practice round-ah hian Ferrari hi car tlan chak ber ni mah se, kumin 2026 season chhungin grand prix pole position an la zo lo zawn vawi 18-na chiah a ni ta bawk. Hetianga beisei an phak loh reng tak avang hian Formula 1 fan-te chuan Ferrari dinhmun chu Premier League club Manchester United dinhmun nen an khaikhin hial a; he Italian team ropui tak hian drivers' championship nomawi an chawi lohna chu kum 19 zet a tling chho ta reng mai a ni.

Kum 2026 regulation thar hnuaiah Leclerc leh Hamilton te ang driver ṭha ber ber chhawr chung pawhin Ferrari hian beisei an la pha thei lo cheu a ni. Team thlawptute chuan an hlawhchham chhan berte chu inkhelh laia thutlukna siam sual fo te, management lam buaina, hlawhtlin hma hauhva inthlahdahna (complacency) leh motor siamṭhatna kawnga elpui dangte umphak loh vang a nih thu an kawk hlawm a ni.

Texas mualah hian Ferrari chuan lap khata tlan chak theihna (one-lap pace) an nei zo leh ta lova, Zirtawpnia an chet ṭhat ang kha qualifying pawimawhah an pholang chhunzawm thei ta lo a ni. Hamilton leh Leclerc te tan hian tlar hnihna leh thumna aṭanga main race tlan a ngai dawn a, khelmualah engtiangin nge an chet chhunzawm dawn tih chu nghah a la ngai a ni.