Manchester United chuan thlasik transfer window inhawng turah Roma full-back kum 23 mi Wesley Franca lakluh dan kawng an ngaihtuah mek a, he Brazil international hi £50million (€60m) vel a tova chhuat a ni. Manchester United bakah hian Premier League-a an elpui Arsenal leh Newcastle United te pawhin he player hi an ngaihven hle nia tarlan a ni.
Football Insider-in a tarlan dan leh The Peoples Person-in a tarlang chhawngin, United hian thlasik transfer inhawng turah Franca hi uluk takin an thlithlai mek a ni. Hemi chungchangah hian United hian dawrna nemnghet an la thehlut lo va, an ngaihven zui mek chauh a ni thung. Swedish chanchinbu Fotbolltransfers pawhin Roma hian an player man atan hian €60million vel an phut niin a tarlang bawk.
United hian an tlarhnung vengtu thuamchak an duh avangin, an player lak luh tumte list-ah Franca hming hi a tel ta a ni. Premier League match pariat khelh tawha vawikhat chauh hnehna changa 13-na dinhmun luah mek United tlarhnung hi sawisel a hlawh hle a. Full-back position pahnih mual veilam (left-back) leh mual dinglam (right-back)-ah inthlakthlengna leh thawmṭhatna an mamawh hle a, Luke Shaw-a dinhmun leh Diogo Dalot-a khelh dan te chu hotute ngaihtuahna luahtu ber a ni.
Kum 2025 nipui khan Franca hi Brazilian club Flamengo aṭangin Roma hian an lalut a, Serie A club-ah hian an player rinrawl berte zinga mi a ni chho nghal a ni. Ke dinglam hmang thiam a nih rualin mual sir tuak tuak (right-back leh left-back)-ah a khel thei ve ve a, he a theihna hi United-in lak luh an duh chhan ber pakhat a ni bawk. Tun season chhungin inelna hrang hrangah match 8 a khelh aṭangin vawi 7 bul ṭanin assist vawi khat a nei tawh a ni.
Transfermarkt data aṭanga a lan danin, Franca hian Serie A-ah minute 432 a khel tling tawh a, Champions League-ah minute 180 khel tawhin yellow card vawi khat a hmu bawk.
Arsenal leh Newcastle United te pawhin he Brazilian player hi an enthla reng a, mual sir vengtu full-back ṭha lakluh an inpeih at reng nia tarlan a ni. Hemi avang hian thlasik bazar inhawng turah hian inumchhohna a chhuak maithei a ni.
Mahse, season laili (mid-season)-a a man atana £50m chhiar a nih hian January window-ah hian United tan inremna siam a harsa deuh maithei a, a bikin Roma lam hian an player pawimawh tak hi season chawhma lam lek a la liam tina hralh an duh kher lo maithei a ni. Engpawh nise, full-back position pahniha a khelh kawp theihna hian United mamawh phuhru turin a tlin hle thung.
United hian full-back dang lakluh theih dan kawng pawh an dap tel reng a, Barcelona left-back Alejandro Balde pawh an ngaihven mek nia tarlan a ni. January transfer window a hnaih chhoh zel takah chuan United hian an ngaihvenna hi dawrna tak takah an chantir dawn em tih chu hriat chhoh thuai a ni ang.
