Manchester United-in an academy thuamchak zel tumin Danny Hastings chu Under-13s Coach Analyst atan an ruat fel ta. LinkedIn-a a profile tarlan danin, Hastings hian September thla aṭang khan he hna hi full-time-in a thawk ṭan tawh a ni. The Peoples Person-in a tarlan danin, he ruatna hi United-in an academy tihhmasawn an tumna kawnga hmalakna thar ber a ni a, player naupang ṭha chauh ni lovin, anmahni chherchhuaktu tur staff ṭha tak tak lakluh thlengin hma an la mek a ni.

Hastings hian Liverpool-ah kum sarih dawn hun a lo hmang tawh a, kum 2014 aṭanga 2021 inkar khan International Football Academy Coach hna a lo thawk ṭhin a ni. Hemi chhung hian Liverpool Women's Under-10, Under-12, Under-14 leh Under-16 team-te a lo enkawl tawh bakah, lailawkin Under-21 team coach hna a lo thawk bawk. Liverpool a chhuahsan hnu hian Fleetwood Town a zawm a, chutah chuan kum ruk chhung hun a hmang leh a ni. Fleetwood-ah hian International Academy Lead Coach leh Lead Youth Development Phase Coach hna te a lo chelh tawh a, hei hian academy inrelbawlna hrang hrangah tawnhriat ṭha tak a neih phah a ni.

United-a a hna tharah hian Hastings-a'n Under-13 team-te a bik takin a buaipui dawn a, rawltharte zirtirna leh an khelh dan thlirletna (analysis) kawngah a theihna a rawn thawh dawn a ni. Age group hrang hrang a lo enkawl tawh ṭhin avangin tawnhriat a ngah hle a, hei hian Carrington-a rawlthar chhuak turte chherchhuahna kawngah nasa takin United hi a puih a beiseiawm hle.

Hastings-a lo luh hma hian United-in an academy thuamchak nan hma an lo la nasa tawh hle a. Rawlthar Noah Ajayi-a professional contract hmasa ber an ziahpui tawh a, ram chhung club dang leh an elpui lian te academy aṭangin player naupang ṭha tak tak an lo la tawh bawk.

Chung an player lak thar zinga langsar zualte chu - Manchester City academy aṭanga an lak Karim Cassim leh David Eze te an ni a, Liverpool aṭangin Isaac Konde-a pawh an la bawk. Hemi bakah hian English academy dang aṭangin Tynan Thompson-a leh Kit Margetson-a te pawh United-in an lo la tawh a ni. Hei hian United-in player ṭha chauh ni lovin, coaching staff thlengin an la a ni tih a tilang chiang hle.

United-in an player naupangte chherchhuahna tur inrelbawlna ṭha tak din an tum a, Hastings-a ruatna hian Under-13 set-up ah analyst-coach rintlak tak a belhchhah dawn a ni. Liverpool-a lo thawk tawh ṭhin ni mah se, Hastings-a tawnhriat hi a zau hle a, international academy coaching te, hmeichhe team enkawl te leh Fleetwood-a youth development hna a lo thawh tawhnate chuan United-ah hian nasa takin awmze thar a rawn neihpui ngei an beisei a ni. Carrington-a hmakhua thlira United hmalakna hian rah ṭha a chhuah ngei an beisei hle.