Manchester United forward Joshua Zirkzee chu January transfer window inhawn hunah Old Trafford aṭangin a chhuak maithei a, Italian club lian Fiorentina leh Juventus te chuan lakluh tumin an ngaihven thar leh mek a ni. Mahse, ram tana a feh chhuahnaa a chet ṭhat em avangin Manchester United chuan he Dutch international hmabak chungchangah hian ngaihtuahna thar an neih phah a, a chhuak a nih pawhin a man atan an chhiar zat chu an tihsan phah ta thung.

Zirkzee hian ram tana hlawhtlinna a chan chhoh tak avang leh khelmuala a theihna a phochhuah ṭhat chhoh tak avang hian, United hotute chu a chungchangah an inngaihtuah nawn leh a ngai ta a ni. Italian Serie A club pahnih Fiorentina leh Juventus te hian an squad thuam chak nan he forward hi an ngaihven zui reng a, January thla transfer bazar inhawng turah hian dawrna thar an thehlut leh maithei a ni. Mahse, United lamin he Dutch striker man an chhiar zat an tihsan tak avang hian club dawrtute tan hian lakluh a awlsam dawn ta lo hle a ni.

A nihna takah chuan, nipui transfer bazar chhung pawh khan Joshua Zirkzee hi Manchester United chhuahsan hnai tak dinhmunah a lo ding tawh a. Premier League club eng emaw zat bakah Italian Serie A club hrang hrangte chuan a hming hi an lo ngaihven em em a, lakluh ngei tumin an lo umzui hlawm a ni. Mahse, khami ṭum khan he Dutchman hian Fiorentina lama insawn theihna hun remchang awm chu ama duhthlanna ngeiin a lo hnawl ta zawk a nih kha.

Chu mai bakah, nipui transfer bazar khar ni (deadline day)-ah khan Premier League club Everton chuan beisei loh tak maiin Zirkzee hi lakluh tumin hma an rawn la thut a, mahse an transfer tumna hi a hlawhtling ta chuang lo a ni. Chutiang boruak kalsan a United-a cham zui ta Zirkzee hian tunah chuan ram tana a inlan ṭhat zar a zo chho mek a, United lamin a man to zawk an chhiar tak bawk avangin January transfer window a inhawn hunah engtiangin nge thil a kal zel dawn tih chu thil ngaihvenawm tak a ni chho mek a ni.