Manchester United player ṭhenkhatte khelmual piah lama an nungchang leh nunphungah professionalism an tlachham hle nia Gary Neville-a'n dem taka a sawiselna chu, United head coach Michael Carrick chuan engah mah a ngai lo tih a lantir.

Kar liam ta khan Old Trafford-ah Bournemouth laka 3-0 ngawta United an tlawm hnuah, United defender hlui Neville chuan Sky Sports podcast-ah United player ṭhenkhatte khawsak dan leh nunphung chu na takin a sawisel a ni. Neville chuan, "Mual piah lamah thil ti tak tak lo (unprofessional) player tlem an awm a ni. Manchester-ah ka cheng a, an zinga ṭhenkhat hi an professional lo hle tih ka hria. An tana hun hman ral hi ka chak lo a ni," tiin a sawi.

Neville chuan a sawi chhunzawm zel a, "An zinga ṭhenkhat hi hun dik takah an mu ngai lo a, thil ei tur dik an ei lo bawk. Ni tin leh minute tin hian Manchester United chungchang hi an ngaihtuah thleng phak lo a ni. Professional tak anga club tana rinawm leh inhmang zo tur an nih laiin, he club tan hian an nun an hlan lo a ni. A chhan chu an intilian lutuk a. Lal William ang main an inngai a, mahse engmah an ni si lo. Player ṭhenkhatte awm dan leh tihdan phung tlahniam lutuk hi ka awih thei lo a ni. Bournemouth nen an inkhelh ṭum khan Stretford End-ah 'standards' tih tarlangna puanzar an khai a, kha thil kha chu hmangah khan a liam tawh a ni," tiin na takin a ṭawngchhuak a ni.

Ningania press conference an neihnaah Carrick-a hnenah Neville-a thusawi hi zawh a ni a, January thlaa United a enkawl ṭan aṭangin hetiang nungchang ṭha lo leh unprofessional tak hi a tawng tawh em tih zawh a ni. Carrick chuan tlang takin, "Teuh lo mai, tawng lo," tiin a chhang a ni. Gary Neville-a'n United player-te nungchang a rawn puangzar mai hi mak a ti em tih an zawh lehin, Carrick chuan zangkhai takin, "Gaz (Gary Neville) hian thil a sawi hnem thei em a ni," tiin chhanna tawi te a pe nghal a ni.

January thlaa Carrick-a'n mawhphurhna a lak aṭangin nungchang ṭha lo leh dan bawhchhiat avanga hrem chhuah mualfo player an la awm lo a; mahse a hma a lo enkawltu Ruben Amorim leh Erik ten Hag-te erawh an hun lai khan player-te nungchang chungchangah hian buaina an lo tawk ṭhin a ni. Head coach hlui Ole Gunnar Solskjaer pawhin kum 2023-a an kawmnaah, "Player ṭhenkhat chu an mahni inngaihtlanna aiin an mizia a chhe zawk," tiin a lo sawi tawh bawk.

Season liam taa Carrick-a'n interim manager a nih laia a enkawl chhung khan, United hian Premier League team dang zawng aiin point an hmu hnem ber a; mahse tun season-ah erawh match 12 an khelh tawh chhunga vawi hnih chauh hnehna an la chan avangin boruak a rit chho hle a ni.