Manchester United manager hlui ropui Sir Alex Ferguson chuan hriatna hloh (dementia) veite puihna charity 'Playlist for Life' tan £100,000 a thawh a, hemi rual hian ama Spotify playlist a tarlang bawk. Kum upat vanga thluak chak lo leh hriatna hloh buaina nei a unaupa ngei pawhin he harsatna hi a tawh mek avangin, Sir Alex hi nikum aṭang khan he charity-ah hian ambassador a lo ni tawh a ni.
He charity, Glasgow khawpuia hmunpui nei leh UK ram chhung hmun hrang hranga inzar pharh hi Scottish chanchinbumi leh thuziakthiam Sally Magnusson MBE din a ni a. A nuin hetiang harsatna a tawh laia hla awmze nei leh hriatrengna thar thawh theitu zai rimawite'n a nu rilru a tihharh dan a hriat chhuah hnuah a din chho ta a ni. Mithiamte zirchianna (scientific research) pawhin a tarlan danin, miin an hun kal tawha an lo ngaihthlak ṭhin hla ngeiite ngaihthlak nawn leh hian rilru hahna leh lungngaihna a tiremin, dam chhung nun khawchhuah dan a tiṭha sawt tih hmuhchhuah a ni. He charity thiltum ber chu dementia vei zawng zawngte'n an inenkawlna kawnga mimal hla ngainat bik playlist an neih theih nan a ni.
Sir Alex hian he pawisa hi a nu hriatreng nana a lo din 'The Elizabeth Hardie Ferguson Charitable Trust Fund' aṭangin a pe a, charity hotute pawhin an hna thawh chhunzawm zelah a ṭangkai em em dawn tih an tarlang.
Ferguson chuan heti hian a sawi: "Kan zavai hian chhungkhat laina emaw kan hmelhriat dementia veite chu kan nei vek ngei ang. Ka chhungkua ngei pawha a nghawng dan leh harsatna a rawn thlen dan chu ka hmu tawh a, a khirh zia pawh ka hria a ni. Mahse hetiang dinhmuna pui thei ber thil chu rimawi (music) hi a ni tih ka hre bawk. Chuvang tak chuan 'Playlist for Life' leh dementia damdawi inenkawlnaa hla hman tel an tumna hi ka thlawp tlat a ni.
"He charity hian UK pum pui chhungah rimawi awmze nei hmangin dementia veite nunah inthlakdanglamna ropui tak a thlen mek a ni. Kan tana hla pawimawh tak takte hian kan nuna kan thil lo tawn tawhte a rawn hriatchhuahtir ṭhin a, dementia vei tana chu chu a rawn thlen rualin hriatrengna hlu takte a rawn ti thar lehin, natna lan chhuah dan a tirem a, mi dangte nena inzawm lehna a siam ṭhin. Thil harsa lo te mah nise, he natna tuartu tan chuan khawvel danglam tak a siamsak thei a ni," tiin United boss hlui chuan a sawi belh bawk.
September ni 18, Zirtawpni hian Playlist for Life chuan kum tin an neih ṭhin 'National Playlist Day' an hmang dawn a, charity leh Sir Alex te hian mi tinte chu anmahni puala hla playlist emaw an mi ngainatte puala playlist siam turin an ngen bawk a ni.
Sir Alex-a playlist-ah hian a hla duh zual 20 a thlang chhuak a, The Beatles, The Drifters, Kitty Kallen, Elvis Presley leh Dusty Springfield te hla bakah Sinatra leh Nat King Cole te hla a tel bawk. Tun hnai khan Queen hla lar 'We are the Champions' chu a playlist-ah a dah belh leh a, he hla hian Manchester United chanchina hlawhtlinna ropui tak a hriatchhuahtir ṭhin thu a sawi.
Sir Alex chuan, "Rimawi hi ka nunah hmun pawimawh tak a ni. Keima personal playlist aṭangin Frank Sinatra aṭanga Nat King Cole thlengin hlate ka rawn tarlang a, midang pawh hetianga ti ve tur hian ka fuih duh a ni. Ka playlist-ah hian 'We are the Champions' ka dah chhan chu kum 1993-a Manchester United-in a vawikhatna atana Premier League title kan lak ṭuma Old Trafford-a kan intlar kual (lap of honour) kha min hriatchhuahtir ziah ṭhin vang a ni. Hla pakhat te mai pawh hian kan hun kal tawh hriatrengna min tawn thartir kawngah thiltihtheihna nasa tak a nei a ni," tiin a sawi.
Playlist for Life executive director Michael Timmons pawhin he thawhlawm hi a hlu hle tih sawiin, "Sir Alex hi kan charity tana ambassador ropui tak a ni a, tlawmngaihna leh rilru zaidamtak nen kan hna thawh hi a chawi sang hle a ni," a ti bawk.
