Manchester United academy chhuak zinga hlawhtling chho tak pakhat Willy Kambwala chuan, Champions League-a a club hlui a hmachhawn hmain a career-a thutlukna pawimawh tak a siam fel ta a. France rama thalai team lo aiawh tawh thin he defender hian a pianna ram Democratic Republic of Congo aiawh zawk turin thutlukna a siam a ni.
Old Trafford-a first-team tana match tha tak tak a khelh hnuah, United chuan Villarreal hnenah £8m velin an lo hralh a. Hliamin a tihbuaichhoh deuh avangin beisei angin kal tluang pur pur lo mah se, Carrington-a a awm chhung khan theihna tha tak a nei tih a lantir hman a ni. Kumin nipui bazar khan he defender hian manager Cesc Fabregas-a enkawl mek Italian club Como chu a zawm a, Champions League-ah United nena an inhmachhawn hmain ram aiawh chungchangah rilru a siam fel ta zawk a ni.
Leny Yoro ang thova France senior team aiawh theih chu a beiseina lian tak ni mah se, chumi thleng tur chuan hun tha a nei tlem hle tih a inhria a. Chuvang chuan ram aiawhna kawnga dinhmun tha zawk chang tura ngaihtuahin DR Congo tana khelh chu a thlang ta a ni. Kambwala hian October ni 2 khan Uganda lakah Congo tan a debut match a khel nghal a, si hnih faia an tlawm chungin team tlarhnung tana player rintlak a nih theih zia a lantir tan der tawh a ni.
September thla khan social media (Instagram) lamah thuchhuah siamin a thutlukna hi a lo tarlang tawh a, Kambwala chuan: "Democratic Republic of Congo, ka pianna ram. Ka vawi khat nan football ka pet tanna ram, he infiamna ka atchilh tanna ram leh professional footballer nih ka suangtuahna inṭanna ram a ni. Chuvang chuan chapopui tak leh zahawmna sang ber nen he puanzar leh he ram pumpui tan hian ka theihtawp chhuah ka duh a, ka thawk bawk ang. He malsawmna avang hian Pathian chungah lawmthu awm rawh se," tiin a rilru dik tak a lo phawrh chhuak a nih kha.
DR Congo hian ram dang aiawh thin player tha tak tak an senglut chho zel a, United player hlui dang Axel Tuanzebe leh Aaron Wan-Bissaka te pawhin he African ram hi aiawh tawhin, World Cup-ah pawh beisei phak bakin ropui takin an lo chet tawh bawk a ni. Kambwala-a rawn tel belh hian an tlarhnung a ti nghet lehzual ngei ang a, United tantute tan pawh DR Congo hi international football-a an thlawp zui tak tak tur team an nih chhoh phah hle bawk.
Como-in Champions League-a United an mikhual hunah chuan, Kambwala hi ram aiawh international cap nei tawh niin a lo inhmachhawn dawn a, United academy tana chanchin chhuanawm tak thlentu a tling chhunzawm zel a ni.
