Craven Cottage-ah Manchester United chuan minute 89-naa deflection goal lut hmangin point khat an hlawhchhuak hram a. Mahse, United player hlui Ashley Young chuan he inkhela an khelh dan hian team-in chak duhna leh thahnemngaihna an tlachham hle tih a pholang chiang niin a sawi.

He inkhelah hian minute 63-naah Lisandro Martinez-a'n anmahni goal-ah ball a tiper palh (own goal) a, Fulham lamin hma an hruai a ni. United hian tun season-a an Premier League tlawm vawithumna an hmachhawn mai dawn emaw tih hnuah, minute 89-naah Matheus Cunha-a ball pet chu defender per kawiin goal-ah a lut ta hlauh a, si khat ve ve inhnehtawkin match an khar thei hram a ni.

First half chhung khan Bruno Fernandes leh Cunha te chuan goal ban an pet per ve ve tawh a, mahse inkhelh chhung zawngin Fulham nawr na zui reng thei tur khawpa chet lak chhunzawm erawh an harsat hle thung. Fulham hian inkhelh pumhlumah theihna sang tak pholangin an nawr let ve reng bawk a ni.

Match zawhah Sky Sports-a a sawinaah Young chuan United khelh dan chu a muang lutuk a, hmanhmawhna leh thahnemngaihna an tlakchham thu a tarlang. Fulham tlarhnung tihbuai theihna hmunah pawh chak zawka nawr lovin, player-te chuan ngaihtuahna an seng nasa lutuk zawk nia a hriat thu a sawi bawk. Chu mai bakah, Fulham zawk chu hnehna chang tura nawr na zawk an nih thu a sawi bawk a ni.

United striker hlui Louis Saha pawhin an khelh muan dan chungchangah hetiang deuh bawk hian thurualpuiin, chak taka an nawr hian an theihna a lang ṭhin a, mahse intensity sang tak an vawn retheih a ngai a ni a ti. Minute 70 emaw 80 hnuah chutiang theihna vawng nung thei tawh lo an awm a nih chuan lakchhuah zung zung tur a nih thu a sawi bawk.

Match statistics enin United-in ball pet an ngah zawk viau laiin, Fulham erawh an che hlawhtling zawk thung. United hian shot vawi 29 an nei a, target-ah vawi 6 a kal a; Fulham chuan shot 12 an nei thung. Expected-goals (xG) lamah United-in 1.60 an neih laiin Fulham chuan 1.62 an nei ve thung a ni.

Khelmuala tlan zawng zat (distance covered) ah Fulham chuan 116.7km tlanin United-in 110.2km an tlan a, sprint neih zatah Fulham-in 101 neiin United-in 91 an nei thung. Ball chan zat (possession) ah United-in 58 per cent neiin Fulham-in 42 per cent an nei a, corner pawh United-in vawi 13 lai an hmuh laiin Fulham chuan vawi thum chiah an hmu thung. Heng Sofascore data-te hian chance nei tam zawk mah se, mual chhung an thununna chu chaknaah an chantir zo lo tih a tilang chiang hle.

Young-a sawiselna hi United tana hun khirh tak karah a lo chhuak a ni. Michael Carrick-a naute hian tun season-ah inelna hrang hrang match sarih an khelh tawhah vawi hnih chiah hnehna an la chang a, game nga an khelh hnuin Premier League-ah 12-na dinhmun an luah mek a ni.

Fulham laka an buaina hi result chhiat lam chauh a ni lo va, chance insiam thei mah se match chhung zawnga tempo sang leh rilru puitling taka khel thei lo an nihna chu sawi zui ber a ni chho mek. Season liam taa Carrick-a interim manager a nih laia team boruak zangkhai tak awm ṭhin kha tunah chuan result ṭha an hmuh theih meuh tawh loh avangin a reh tial tial bawk.

International break zawhah hian United hian Tottenham Hotspur an mikhual dawn a. Spurs hi league mawngphahah awmin kumin season-ah hnehna an la chang miah lo bawk a, Fulham laka an chet chhiatna siamṭha turin hunṭha an nei nghal dawn a ni. He chawlh hian Young leh Saha ten an tarlan, rang zawk leh thahnemngai zawka khelh a ṭulna chu chinfel nan Carrick-a tan hun a pe dawn a ni.