Pathiannia Craven Cottage-a Fulham leh Manchester United te 1-1 a an inhnehtawk ṭum khan, Fulham defender Calvin Bassey-a kutah ball a per chungin United chu penalty pek an ni lo a. Referee thutlukna siam chu VAR lam pawhin an nemnghetsak zui bawk a, hei hian United head coach Michael Carrick chu a tilungawi lo hle a ni.

He thil thleng hi minute 86-naa thleng a ni a. Lisandro Martinez chuan Fulham tlarhnung lamah ball vawrh lutin, chu chu Bassey-a kutah chiang takin a per a. United player-te chuan referee chu bawr nghalin penalty an phut nghal chuk chuk a, mahse VAR hmanga uluk taka enfiah a nih hnuah referee thutlukna siam sa chu pawmin inkhelh chhunzawmtir a ni ta zawk a ni.

September ni 20 khan Premier League Match Centre chuan he thil thlengah hian match official-te inbiakna lehkha (transcript) chu social media platform X-ah an tarlang a, penalty pek a nih loh chhan chu an hrilhfiah. Assistant referee chuan ball leh kut a inawk ngei tih lo hmu mah se, Bassey-a ban chu a taksa hnaiha a awm thu a tarlang a, chu chu khelmuala referee thutlukna siam nen a inan chiah avangin VAR pawhin referee thutlukna chu an nemnghetsak ta a ni.

Sky Sports tana thawk Gary Neville erawh chuan he thutluknaah hian Fulham an vannei hle niin a ngai thung a. Defender pakhat tan khatiang boruaka a ban lo dah vah mai kha a mak hle a, chutiang a nih chuan referee-te rinhlelhna tawk thei reng dinhmuna a indah vang a nih thu a sawi ve bawk.

Bassey-a chunga thil thleng hi United ṭantute rilru tihnualtu thil thleng thar ber a ni a, Manchester derby-a Manchester City nena an inhmachhawn ṭuma referee thutlukna siam avanga an lo lungawi loh tawh hnu lawka thleng leh nghal a ni bawk.

Referee thutlukna siam dik leh dik loh chu thu hran nise, United hian minute 89-naa Matheus Cunha-a goal khung mawi tak hmangin an siphurh an sut hram a, Carrick-a hmel ti-hlim zui turin point khat an hlawhchhuak ta tho a ni.

Carrick-a tana buaina lian zawk erawh chu referee thutlukna lam ai mahin an inkhelh dan phung kha a ni. Craven Cottage-ah hian United hi a tlangpuiin an zawi hle a, mualneitu Fulham chu tlan chak leh thawhrim lamah an khan lo fo a ni. Chance ṭha tlem a zawng insiam ve in goal ban vawi hnih lai pet per hman mah se, an inkhelh pumhlum dan erawh chuan Old Trafford vela thawm ṭha lo awm mek chu a tiziaawm phah chuang lo.

He an khelh dan hi tun hnaia Everton nen an inhnehtawk ṭuma an boruak nen khan a inang hle a, inkhelh thunun zawk nih aiin hun tawp dawna chhanhim ngai bawk an nih zia a pholang a ni. Head coach a nihna anga sawiselna tawk chho mek Carrick hian, VAR chungchang buaipui hmain a squad fitness tlak hniam lutuk siamṭhat chu a hna hmanhmawhthlak ber a nih thu a lang chiang hle a ni.