Kum 2025 tawp lam khan Manchester United chuan luikawm aṭanga lunghlu chhar chhuak ang maia theihna nei ṭha, rawlthar centre-back Ayden Heaven an chhar chhuak a ni tih hai rual a awm lo. He kum 19 mi tlarhnung defender hian a theihna sang tak chu khelmualah pholangin, khelmual laili leh tlarhnung vengtu atan a rintlak zia a lantir a, chu a khelh ṭhat em avang chuan December thla chhung khan club-in 'Player of the Month' chawimawina hial an hlan phah a ni.

£1 million lek senga Red Devils lamin an lakluh a nih ngaihtuah phei chuan, United hian an defender pawimawh Lisandro Martínez-a thlaktu tur inpeih sa thlap (ready-made), Argentine star chhawk thei tur player ṭha tak an nei ta ngei niin mi tam takin an ngai a. A ke veilam hmang thiam a nih bakah, Martínez-a ang maia ball pet chhuak thiam leh tlarhnung aṭanga remruat thiam a nihna chuan Old Trafford-ah beiseina sang tak a neihtir hman a ni.

Mahse, head coach Michael Carrick-a'n United star che buai fo ṭhin (reckless star) laka a rinna a nghah tlat avang leh a duhsak tlat avangin, he rawlthar theihna nei ṭha tak hmasawnna leh ṭhanlenna hi a thuanawp phah mek a ni. Carrick-a thutlukna hian Heaven-a hmabak chu Manchester United-ah a tithim chho hle a, first team-a hmun chang tura beisei a nih laiin khelmual pawn lamah a nawrchhuak ta zawk a ni.

Defence-a tihsual nei fo leh fimkhur tawk lo ṭhin senior player dah lal zawk tlatna hian squad chhungah Heaven-a dinhmun a tiderthawng a. He rawlthar kum 19 mi tana a ṭhan zel theih nan match khelh tam a mamawh laiin, bench-a ṭhuttir reng emaw inkhelh theihna hun hlawm lian pek loh hian a football zinkawngah nghawng ṭha lo tak a nei mek a ni.

Chuvang chuan Ayden Heaven-a dinhmun hi chhanhim a nih theih nan Carrick leh coaching staff-te hian thutlukna fing zawk an siam a ngai a ni. Martínez-a thlaktu tura beiseina sang tak nei a nih angin, amah rintawkna nena bul ṭantir ngam a ngai a, a nih loh pawhin senior level-a regular taka match a khelh theih nan a dinhmun herrem pui vat a ṭul tawh a ni. Player naupang theihna sang tak nei hi chhawr mang lova dah mai mai a nih chuan, United tan thil uiawm tak a la ni thei dawn a ni.