Manchester United a vawi hnih nan Michael Carrick-a'n a enkawl ṭanna inkhel hmasa ber chu mahni mual Old Trafford-ah Manchester City lakah a ni a, Pep Guardiola-a naute chu 2-0 ngawtin an hneh a nih kha. Inkhelh chhung thlirin 5-0 emaw a aia tam mahin an chak thei hial zawk awm e. Khami ṭum khan Patrick Dorgu chuan tlarhma veilamah (left wing) bul ṭanin, goal a khung bakah a khel ṭha em em a, Carrick-a rilruah winger pawimawh tak angin hmun a chang zui ta reng a ni.
Mahse, tun kar tawp derby-ah erawh Dorgu hian chona danglam hlak a hmachhawn a ngai tawh dawn thung. Winger anga kal tluang tura ngaih a nih laiin, Hull City laka a chet ṭhat tawk loh hnuah tlarhma veilam hmun chu Marcus Rashford-a lakah a hloh ta a, he thutlukna siam hnu hian Carrick pawhin Rashford chu a chhawr zui ta char char a ni.
Hemi hnu hian Ipswich Town leh Everton lakah te Dorgu hi starting line-up-ah a tel ta lo va. Mahse Champions League-ah Sabah an hmachhawn ṭum khan bul a ṭan leh a, mahse winger ni tawh lovin left-back-ah a rawn inlan ta zawk a ni. A khelhna hmun ṭha ber tur chungchangah inhnialna a awm reng hnuah, Champions League inkhelah khan left-back-ah Dorgu hi a langsar hle a, assist a neih bakah hetianga a chet ṭhat tak avang hian tlarhma lam aia tlarhnung full-back anga chhawr zui zel duhna a tisang ta hle a ni.
A theihna zawng zawng pho chhuah theihna hun a ni a, a chakna, a tlan ran theihna leh a taksa thahruai en chuan Luke Shaw aia thawhhlawk thei tur khawpa theihna nei a ni tih a chiang hle bawk. Tun ṭum Manchester derby-ah hian Shaw hi a inhliam avangin a khel thei dawn em tih a la chiang lo va, chuvang chuan Dorgu hian he hmunah hian bul a ṭan ngei a rinawm hle. He inkhel pawimawh takah hian a khel ṭha a nih ngat chuan Shaw-a thlaktu tur nghet nihna a hauh zui nghal theih hial a beiseiawm a ni.
A tir takah chuan United hian Dorgu hi full-back ni tur ngeia an lak luh a ni a, tlarhma thlenga tlan kual thei left-back ṭha tak nih theihna tur ralthuam a nei kim hle. Tlarhnung venhim lamah zawhna la awm deuh mah se, thla 10 chuang zet winger anga a khelh hnuah defender hnaa insiamrem leh tur chuan hun a duh ve deuh dawn a ni. City lakah hian rang taka insiamremin Phil Foden-a a dan theih phawt chuan United tana a ṭangkai zia a pholang lehzual dawn a ni.
Dorgu-a full-back anga a chet ṭhat chhoh zelna hian Manchester United chu sum tam tak a humhimsak thei dawn bawk. Sabah laka a khelh dan ṭha tak ang hi a chhunzawm zel a nih chuan, kum 2027 transfer bazar atana United ruahmanna chu nasa takin a inthlak thei ang. United-in Shaw-a thlaktu atan an lak luh tum ber nia ngaih chu Lewis Hall a ni a, mahse Newcastle United nena contract thar a ziah tak avangin Hall-a man hi nakkum nipuiah chuan £100m vel hial a kai a rinawm tawh a ni.
Dorgu hi a hlawhtling a nih hlauh chuan United hian Lewis Hall-a umzui hi an ṭhulh thei ang a, Dorgu leh Harry Amass te inel tawnna hnuaiah United hian kum 10 chhung zet chu left-back position chungchangah buaina an nei tawh lo thei dawn a ni. Mahse chu thil zawng zawng chu tun derby-ah hian a innghat dawn a, bul a ṭan a nih chuan Carrick-a hmaah hmun nghet chang tlak a nih zia a fiah a ngai dawn a ni.
