Ningani zana Champions League-ah Manchester United-in Sabah 4-0 a an sawp ṭum khan, kum 21 mi Kobbie Mainoo chu a khel ṭha lehpek hle a. Kumin nipuia World Cup-ah minute khat mah a khelh ve loh hnua hun harsa a paltlang hnuin, a zawnin match thum chhung United midfielder zingah a che ṭha ber a ni leh ta a ni.
Ipswich, Everton leh Sabah laka hetianga a rawn chet ṭhat leh tak avang hian, Pathiannia Old Trafford-a Manchester City nena derby match an khelh turah head coach Michael Carrick-a ruahmanna laili ber a luah let leh nghal a ni. World Cup-ah khan England-in Argentina laka semi-final an hloh thleng khan bench-ah ṭhuin hun a hmang ral a, third-place play-off a France an hmachhawn ṭum phei chuan hliam chhuanlamin bench-ah pawh a tel lo a, chutiang dinhmun aṭanga hetiang taka a rawn in vawrh kang leh hi thil chhinchhiah tlak tak a tling a ni.
The Guardian-in a tarlan danin, World Cup match zawh apiang khan Mainoo hi England player zinga stadium chhuahsan hmasa ber a ni ziah a, a hmelah pawh rilru puthmang danglam hmuh tur a awm ngai lo. Thomas Tuchel chuan defensive midfield lamah Elliot Anderson leh Declan Rice te chu a thlang ziah a; Reece James, Jude Bellingham, Jordan Henderson, Morgan Rogers leh Nico O'Reilly te pawh Mainoo aia hman an ni fo bawk.
Khelmualah hun a chang lo chung pawhin, zin kual leh training vel avangin World Cup khan Mainoo taksa a nghawng na hle a. Hei vang hian United pre-season training pawh a zawm tlai a, AC Milan nena friendly an khelh ṭumin minute 30 chauh a khel a, Hull City an hmachhawn ṭum pawhin 2-0 a an hnufual hnuah bench aṭangin a rawn inlan ve chauh a ni.
Hull nena an inkhelh hnu aṭang khan Mainoo hi United midfield-ah player rintlak ber a rawn ni chho ta a. Match thum liam ta chhung khan pass vawi 211 a pek zinga 201 chu a hlawhtling a, ball chan a hlauhawmna hmunah pawh hlauthawng miah lova a che thei hian a theihna san zia a pholang chiang hle. Ball a neih loh lai pawhin a khelh dan a siamṭha chho a, a ke chheh rang tak leh inher kual zung zung theihna hian khingpuite a tibuaiin United tana nawr theihna kawng a hawng ṭhin a ni.
Kumin nipui chhung khan United chuan an tlar laili thuamṭhat nan £155m lai an seng a, Youri Tielemans, Andrey Santos leh Carlos Baleba (Baleba hi hliam vangin a la inlan thei lo) te an lalut a. Chuti chung chuan Carrick-a player thlan hmasak ber chu Mainoo tho hi a la ni a, derby-ah hian a kianga khel tur zawk an ngaihtuah a ni ber. City laka an inlan hunah Tielemans leh Mainoo te chu bulṭantir an nih a, Bruno Fernandes chuan an hnung a dawl beisei a ni a, City midfielder Anderson, Enzo Fernández leh Rayan Cherki te nen an inhmachhawn ang. United fan-te pawhin Billy Ocean-a hla 'Love Really Hurts Without You' chu sa remin, Mainoo tel lo chuan he team hi an kal thei lo tih entir nan an zai hial a ni.
Ruben Amorim-a hnuaiah khan Mainoo hian hun harsa a lo tawng tawh a. Amorim-a 3-4-2-1 tactics-ah khan a leng lova, tlarhnung venhim lamah a rintawk loh avangin season liam ta khan Portuguese manager hnuaiah Premier League match khat mah a bul a ṭan pha lo. Mahse January thlaa Carrick-a'n mawhphurhna a lak hmasak ber, City an hmachhawn ṭum khan bul a ṭan a, 2-0 in United an chak a nih kha.
Carrick hian a team chu khelmual laili aṭanga inkhel thunun a, pass inpe kual zung zung tura a duh avangin, chu mi ti thei tur chuan Mainoo, Tielemans leh Fernandes te an pawimawh hle dawn a. Mainoo hian nipui laia a tawrhna khan amahah theihna thar a chher chhuak zawk a ni tih fiah nan City laka derby inkhel hi a hmang ngei ang le.
