Manchester United defender Lisandro Martinez chuan an defender pui Leny Yoro chu United tlarhnung tana nghahfak leh hmabak eng tak a nih thu a sawichhuak ta.

Ningani liam taa Manchester United-in 4-0 ngawta Sabah Baku an hneh ṭum khan, head coach Michael Carrick chuan nawrna a dawn nasat tawh em avangin Yoro hi a vawi khat nan centre-back laili-ah bul a ṭantir ve ta nge nge a ni.

He inkhelh hma zawng hian, pre-season chhung leh tun season inṭan tirh match hmasa tlemte an khelh chhung zawng khan Yoro hi a khelhna ṭhin pangngai ni lovin right-back lamah chhawr a ni char char ṭhin a. Heta a khelh lai hian talbuai chhe lutuk lo mah se, a theihna tak tak a phochhuak thei bik lo a; centre-back mize nei sa a nih miau avangin fullback-a a khelh khan a lai deuh niin mi tam takin an lo hmu a, an lo ngaihtuah hman hle a ni.

Mahse Sabah laka central defence-a a khelh leh takah erawh a theihna tak tak rawn langchhuakin a phili lo hle a, tlarhnungah rintlak takin a inlan zui a ni. Martinez chuan he French rawlthar theihna hi fak zuiin, khelmuala a inrintawkna leh rilru vawngfim chunga a khel ṭhin chu United tlarhnung tana thil hlu tak leh nakin zel atana club innghahna tur a nih thu a tarlang a ni.