Champions League-a Roma laka ṭha taka an rawn let leh hnu pawhin, Manchester United manager Michael Carrick-a dinhmun hi a la derthawng hle a ni. Season ṭan tir aṭanga an chet chhiat avangin club hotute lakah Carrick-a hmabak hi zawhna lian tak a la tling reng a ni.
Mahni mual Old Trafford-ah Bournemouth 3-0 ngawta an hneh loh hnu khan Carrick hi ban nghal mai tura ngaih a ni tawh a, mahse United hotute inbiakna pawimawh tak an neih hnuah hun ṭha pek zui rih a ni. Hemi hnu hian Pathiannia Aston Villa nen an inkhelh turah hian chakna an hmu a nih chuan hahdamna hun a hmu lehzual ang a, mahse an tlawm leh a nih chuan ban a nihna tur kawng a hnaih lehzual dawn a ni.
United manager hna chelh thei tura ngaihte zingah Newcastle chhuahsantu Eddie Howe, Antonio Conte leh Julian Nagelsmann te hming chu sawi sar sar a ni a. Mahse The Independent thudawnna chuan United boss-te hian mi tam tak lo rin ang aia Howe-a chungchangah hian an rilru an thlak deuh tawh tiin a tarlang. Hemi rual hian German club Stuttgart manager Sebastian Hoeness chu United board chhungah ngaihsan a hlawh hle thung.
Kum 44 mi Hoeness hian kum 2023-a relegate teuh tak dinhmuna awm Stuttgart a enkawl ṭan aṭangin, Champions League khel turin a tlingpui bakah Germany Cup (DFB-Pokal) nomawi a lakpui a, manager zawng zawng zinga che ṭha ber pawlah a inhlangkai a ni. Ani lakluh hi hma lam pan mek Ruben Amorim-a'n Sporting CP aṭanga Old Trafford a pan ṭuma ruahmanna nen khan a inang hle a ni.
United hian Carrick hi ban ngai ta se, hun reilote chhunga enkawltu lailawk (interim manager) ruat nawn leh chhen hi tihtawp an duh tawh hle nia tarlan a ni. Ole Gunnar Solskjaer khan a tirah caretaker-in bul a ṭan a, a hnuah permanent-in an ruat a; November 2021-a a ban hnu khan Ralf Rangnick chu season chhung zawng enkawl turin an la leh a nih kha. Carrick ngei pawh season liam ta chawhnu lam khan lailawkin a lo enkawl tawh a ni.
Sky Sports thudawnna danin, director of football Jason Wilcox leh chief executive Omar Berrada te chuan Carrick-a hmunruak luah tur a awm a nih chuan interim hmang lova a ngheta enkawltu tur (permanent replacement) ruat nghal mai chu an duh zawk a ni.
Chutiang a nih rualin, tun dinhmunah chuan Carrick hian board support a la nei rih a. English manager hian Roma an hnehna hmanga an inrintawkna rawn awm chu Villa an hmachhawn hmain chhawr ṭangkai ngei a duh a ni. Inkhelh chungchang sawiin Carrick chuan, "Match khat atan chuan zan ropui tak a ni a. Kan vaia tan zan ṭha tak ni mah se, engmah kan la hlawhtling lo a ni. Hmakhaw pan nana kan hman tur chhinchhiah tlak pakhat a ni," tiin a sawi.
Roma nen an inkhelh hnu sawizui lehin, "Roma nena match kan en nawn leh khan, first half kha a chhia pawh a ni lo. Mahni inthlahdahna hun tlem a awm a, chungte chu kan siamṭhat a ngai a ni. Chelsea nena kan inkhelh ṭuma first half kha a ṭha em em a. Hmasawnna hmel kan hmu tih a chiang a, chu chu hmalam pan nan kan hman zui a ngai a ni," tiin a sawi bawk.
