Manchester United chuan left-back position an thuam chak loh hnuah, thlasik transfer inhawng turah left-back thar lakluh ngei an tum leh ta a. Kum 24 mi Archie Brown chu an target thar ber a rawn ni a, Premier League-a an elpui lian Liverpool pawhin he player lakluh tumnaah hian thawm an rawn chhuah ve mek a ni.

English Premier League-a khelh hi Archie Brown-a'n a chak hle nia tarlan a ni a, he player lakluh chungchangah hian United leh Liverpool te hi an inremsiam pui thei a nih chuan transfer puitling a piang chhuak thuai thei bawk ang. Manchester United hian kumin chhung khan Luke Shaw-a thlaktu tur rintlak leh hun rei tak chhawr theih tur left-back thar lakluh an lo tum tawh a, mahse an lakluh theih tak loh avangin Shaw-a thlaktu tur zawn hna hi chhunzawm zelin, Archie Brown hi an duh berte zinga mi a rawn ni ta a ni.

Archie Brown bakah hian Manchester United leh Liverpool te hian player hrang hrang an ngaihven kawp mek bawk. Transfer thudawnna hrang hrangin an tarlan danin, Crystal Palace defender Marc Guehi lakluh tumnaah pawh United hian Liverpool hi elpuiin dawrna neih an inpeih bawk. Hei bakah hian Crystal Palace midfielder Adam Wharton pawh nakkum nipui bazar-ah Selhurst Park chhuahsan tura ngaih a nih tak avangin, club pahnihte hian a hmabak hi an thlithlai reng bawk a ni.

Chutih rualin Club Brugge winger Christos Tzolis pawhin Premier League pan a chak thu a lo sawi tawh a, Manchester United zawm chu a duh takzet nia sawi a ni bawk. Engpawh nise, United hotute tan chuan Luke Shaw-a hmunruak luah thei tur leh tlarhnung veilam thuam chak hi thil pawimawh tak a nih avangin, thlasik transfer market inhawng turah Archie Brown-a transfer hi United chet ṭanna pawimawh tak a ni thei dawn a ni.