Manchester United rawlthar Shea Lacey chu a ram aiawh zawk tur chungchangah England leh Republic of Ireland ten an inchuh mek. Kum 19 mi winger hi England youth team hrang hrang tana lo khel tawh ṭhin ni mah se, a pa kal tlangin Republic of Ireland tana khelh theihna hmun a nei a ni.
Tun season-ah United tan a chet ṭhat em avangin Republic of Ireland boss Heimir Hallgrimsson pawhin a ngaihven hle. Ireland aiawh tura inbiakna a awm tawh em tih zawhna chhangin Hallgrimsson chuan, "Hemi chungchang hi chu kan association-a mi dangte mawhphurhna tur a ni a, mahse Ireland nena inzawmna a nei tih hriat erawh thil phurawm tak a ni," tiin a sawi.
Lacey hi England U15 aṭanga U20 level thlengin a lo inlan tawh a, U20 Elite League-a Czechia leh Portugal an hmachhawn tur atana England U20 squad-ah koh tel zui leh rin a ni.
He rawlthar hi tun season chhungin United tan match paruk a inlan tawh a. Thawhlehnia Champions League-a Roma 3-2 a an hneh ṭum khan a rawn inlan a, Matheus Cunha-a goal khung tur pawimawh tak siamsakin (assist) an inchhir lehna (comeback) kawngah a thawh hlawk hle a ni.
International manager-te chauh lo pawhin he rawlthar hi an ngaihven hle a, United head coach Michael Carrick pawhin Roma laka a chet ṭhat hnu khan he winger naupang tak hi a fak hle. Carrick chuan, "Ti uchuuk lutuk kher lo ila, mahse Shea tana ka hlim zia hi a lian takzet a ni. Kan duh em em a, tlangval ṭha tak, hlawhtling duh tak leh theihna sang tak nei a ni. Inside-a rawn lut a, pass ṭha tak a rawn nei nghal kha mak kan ti hran lo," a ti.
Carrick chuan sawi chhunzawmin, "A mitah phurna danglam tak a awm a, khelmualah pawh phur takin a che ṭhin. Mahse player puitling tak nihna angin right-back-a kan mamawh ṭum pawha tlarhnung a rawn veng thei kher mai khan min tihlim em em a ni. Tlarhnung lama a thawhhlawkna leh player naupang zawkte'n hun ṭha an rawn chhawr ṭha em em hi ka hmuh duh tak a ni. Khelmual a rawn rah khan tumah mai pawh phurna min pe a, a hun neih chhung zawng kha a hmang ṭangkai hle a ni," tiin a sawi bawk.
International break a thlen hmain, he Manchester United rawlthar hian tun kar tawpa Premier League-a an inlan leh hunah chet ṭhat nawn leh a tum ang. Red Devils hian Pathianni tlai dar 4:30 (BST) / zanlai dar 9:00 (IST) hian Old Trafford-ah Aston Villa an mikhual dawn a ni.
