Manchester United defender Lisandro Martinez chuan an defender naupang Leny Yoro chu Old Trafford club tlarhnung hmakhua (future) a nih thu a sawi chhuak. Ningani zan khan United chuan Sabah FK chu 4-0 in an sawp a, he match-ah hian Michael Carrick-a naute chuan tun season-ah a vawi khat nan clean sheet an nei a ni.
Azerbaijan Premier League champion laka a chet ṭhat em avangin World Cup winner Martinez hian he French rawlthar theihna hi a chhuang hle a. Laurie Whitwell (The Athletic) hnenah sawiin, "Leny Yoro aṭangin chet ṭhatna ropui tak kan hmu a ni. Tlarhnung venhim kawngah te, ball a khawih laite leh dinhmun hrang hrangah phili miah lova awmin, a khingpui nena an inhmachhawn (one-on-one) chang pawhin a inbengdai thei em em a ni. A nihna takah chuan he club hmakhua a ni a, kan puih zel a ngai a ni," tiin a fak a ni.
Kum 2024 khan United hian Lille aṭangin kum 18 mi lek a nih laiin Yoro hi £52.18m sengin an la a. Kum 16 a nih aṭanga senior football khel ṭan he French defender hian ram tan senior debut la nei lo mah se, United zawm tura thutlukna a siam hmain Real Madrid leh PSG te pawhin lakluh an lo tum ve hle tawh a ni. Kum 20 mi Yoro hian Red Devils tan match 69 a khel tling tawh a, mahse starting lineup-ah erawh hmun nghet a la chang chiah lo thung.
Manchester United hian kum hnih liam ta chhung khan an tlarhma leh midfield thuam chak nan sum an seng hnem hle a, kum thar lamah chuan an tlarhnung siamṭhat lam an hawi chhoh a beiseiawm tawh a ni. Season liam ta tawp khan Harry Maguire chuan kum khat daih contract a ziak a, chutih laiin Martinez leh Matthijs de Ligt te chu tun hnai season-a an hliam neih ngun avangin rinhlelhna a la awm reng bawk. Luke Shaw pawhin a professional career tawp lam a hnaih chhoh tawh avangin United hian left-back thar an lak ngei a ngaih hmel bawk a ni. Hei vang hian Yoro leh rawlthar theihna ngah Ayden Heaven te tan chuan defender ṭha berte zinga tel theihna turin tun season hi season pawimawh tak a ni dawn a ni.
Pathiannia Manchester derby khelh turah Yoro hian bul a ṭan zui zel dawn em tih erawh hriat a la ni lo va, Maguire chu lo kir leh a, Martinez nena United tlarhnung laili ven dun tura beisei a ni bawk. Yoro hian United a zawm hnuah Man City hi vawi thum a hmachhawn tawh a, bul a ṭan ṭum hian United hian derby-ah chak an la nei lo (0-0 in an inhnehtawk a, 3-0 in an tlawm bawk). Carrick-a interim manager a nih ṭuma Old Trafford-a City 2-0 a an hneh ṭum khan bench aṭangin a inlan lo a, 2024-25 season-a City an hneh ṭum khan minute 11 chhung substitute-in a lut thung a ni.
