Manchester United forward hlui Memphis Depay chuan Estudiantes ṭantute laka nungchang mawi lo leh kut zunglai (middle finger) a hmuh avangin South American football thuneitu sang Conmebol chuan an chhui mek tih chanchinbu De Telegraaf chuan a tarlang.

Nilainia Copa Libertadores quarter-final match khelhah, Corinthians tana khel mek Depay hian an team-in siphurh an rulh rualin Argentine club Estudiantes ṭantute lam hawiin a kut zunglai a hmuh lai thlalak leh video chu social media-ah a darh nasa hle a ni.

He inkhelah hian Corinthians leh Estudiantes te hi 1-1 in an inhnehtawk a, minute 49-naah Kaio César chuan Brazilian club tan hian an siphurh a rawn rul a ni. Ball-in goal an luh rual chiah hian Depay hi Estudiantes ṭantute awmna lam hawiin a inher a, kut zunglai pir va va a hmuh lai chu video-ah hmuh theihin a awm zui a ni.

He thil thleng avang hian Argentine club Estudiantes chuan South American football confederation (Conmebol) hnenah complaint thehlutin, Netherlands international forward hi hrem ngei turin an ngen zui nghal a ni.

Estudiantes chuan thuchhuah siamin, a chet dan chu "kan ṭantute laka titualṭha leh chhaih kawlh tumna chiang tak a ni," an ti a. Club lam chuan, "Estudiantes chuan inzah tawnna hi innghahna lungphum a nih thu kengkawhin, hetiang zirtirna zawm a pawimawh zia hi kan nemnghet nawn leh a ni," tiin an tarlang bawk.

Engtiang chiaha na nge hremna a tawh theih dawn tih erawh a la chiang rih lo a. Dutch chanchinbua an tarlan danin, hetiang nungchang mawi lo chungchangah hian hremna bithliah sa bik a la awm meuh lo a ni. Chuvang chuan Conmebol hian Estudiantes complaint thehluh, video awmsa leh thil thlen laia thil awmdan zawng zawngte uluk takin an endik phawt ang a, chumi hnuah a phu tawk hremna an lek dawn a ni.

He thil thleng hi Brazilian club-a Depay-a hun hman mek chhunga boruak thar leh chanchin buaithlak langsar ber a ni leh ta. Thla liam ta August thla mai khan sum leh pai inpek chungchanga inrem lohna avangin Corinthians hian Depay hi chhuah zalenin an lo inṭhen tawh a nih kha.

Mahse he buaina thar a chhuah hma ni tlemteah hian, Depay hian Corinthians nen inremna thar siamin contract a pawtsei leh chiah a, a club hmabak chu nghet zawka a din chhoh theih phah a ni. Chutianga boruak ṭha a neih chhoh leh hnu lawkah Estudiantes lakah he buaina hi a tawk zui leh ta a ni.

Kum 32 mi Depay hian a tir lamah khan Manchester United-ah beiseina sang tak a nei a, Old Trafford-ah theihna sang tak pholang tura ngaih a nih laiin beisei a phak ta lo a, a tawpah club a chhuahsan a ngai ta a ni.

Hemi hnu hian Lyon, Barcelona leh Atletico Madrid-ah te a hun hmangin a khel kual a, tichuan South America lam panin Brazil rama club lian Corinthians hi a zawm ta a ni. Memphis Depay hi Netherlands mipa national team chanchina goal khung hnem ber (all-time leading goalscorer) record chelhtu a ni bawk.