Manchester United chuan a zawnin match thum chhung hnehna an chan tawh loh hnuah international break an hmachhawn a, manager Michael Carrick-a hmabak tur chungchangah zawhna a lian chho hle. Pathiannia Fulham laka 1-1 a an inhnehtawk hnu khan Premier League chawlh lailawk hmachhawn tur hian United hi an chak lo zawn a ni.
He inkhelh hma hian Manchester City leh Brighton lakah an lo tlawm tawh bawk a, league table-ah 12-na dinhmunah awmin Carabao Cup (EFL Cup) aṭangin an tla fel der tawh bawk. Chawlhkar thum hnuah inelna tak tak an hmachhawn leh dawn a, chumi hma chuan Carrick-a dinhmun hi a chiang chho zual tura beisei a ni.
Manager dinhmun chiang lo chungchang bakah hian January transfer bazar atana player lakluh theih turte United hian an thlithlai ṭan mek a. Hemi rual hian kumin nipuia senior team nena zin ve hial, rawlthar theihna ngah tak JJ Gabriel-a chanchin pawh a thar a awm chho zel bawk a ni.
Kum 15 mi forward JJ Gabriel chuan United chhuahsan a tumna kawngah hma a sawn zel a, agent Ali Barat-a puihna a dawng chho mek niin MEN Sport chuan a tarlang. He intermediary nena an inlaichinna hian Real Madrid leh Bayern Munich te ngaihvenna a hlawh chhoh pui mek niin an sawi a ni. Kar liam ta khan Gabriel hian Old Trafford chhuahsan a, hmun danga kawng zawn theih nan United-a a player nihna (registration) sut turin a ngen niin chanchinbu lamah a lo lang tawh bawk.
Dan ang chuan rawlthar te hi kum 16 an tlin hma chuan official agent neih phalsak an ni lo a. Mahse, October 6-a a kum 16 tlin pual hian Barat hi Gabriel-a agent ni tura beisei ber a ni a, hetiang a nih theihna chhan pawh tun hnai kar chhung khan Real Madrid leh Bayern Munich aṭanga ngaihvenna a zawnchhuahsak vang a ni. UEFA Youth League-a Sabah laka hat-trick siamtu Gabriel hi Barcelona leh Arsenal te pawhin lakluh tumin an lo hel ve tawh ṭhin bawk a ni.
United lamin Gabriel-a registration sut sak tura a ngenna hi an hnawlsak rih a, an inkarah inbiakrem theih lohna a awm mek bawk. Mahse, a ngenna hi pawm a nih hlauh chuan, a nu Greek-Cypriot mi leh a pa Republic of Ireland aiawh lo ni tawh Joe Gabriel te aṭanga a dawn theih EU passport hmangin Europe khawmualpui club liante a pan thei dawn a ni.
Carrick-a chungchangah erawh chuan, United hotute chuan manager hna aṭanga Carrick hi ban a, a aiawha Antonio Conte ruat an tum lo niin TEAMtalk chuan a tarlang. Thudawnna chuan club hotute hian harsatna tawk mek an manager hi thlawp chhunzawm zel an tum niin an sawi a ni.
Hetianga inelna a chawlh lailawk lai hi club-ten manager thlak chungchangah thutlukna lian an siam fo ṭhin a ni a. Fulham muala point khat chauh an hlawhchhuah hnu khan Carrick-a tan khelmual sir boruak chu a rit chho hle a ni. Mahse, Italian chanchinbu thenkhatin Carrick a chhuah chuan Conte hi United-in an duh ber niin tarlang mah se, a aiawhtu tur zawn chungchangah inbiakna engmah a la awm lo tih a ni.
Kum 57 mi Conte hi season liam ta tawpa Napoli a chhuahsan hnuah club nei lovin a la awm mek a, kum 2017 khan Chelsea chu Premier League nomawi a lo chawipui tawh a ni. Chuti chung chuan United board chuan tun dinhmunah Carrick-a ruahmanna hi an la thlawp nghet tlat a, mahse he dinhmun hi humhim zel tur chuan international break zawha an khelh leh hunah khelmualah insiamṭhatna hmuh ngei an mamawh tawh dawn a ni.
