Manchester United striker Benjamin Sesko chu a hliam a chhuah thar leh tak avangin kar tawpa Fulham laka an inkhelh ṭum khan a inlan thei lova, hemi hnu hian Slovenia national team squad aṭangin a inhnukdawk zui ta a ni.

Kum 2025 October thla aṭang khan Sesko hian Slovenia tan match a la khel leh lova, a zawnin hliam vangin ram tana kohna a hmaih char char a ni. Tun ṭuma a hliam chhuah thar leh hian Manchester United tan mai bakah a ram national team tan pawh lungngaihna leh beidawnna lian tak a thlen a ni.

Sesko hian season liam ta tawp lama Liverpool an hmachhawn ṭuma a chawnruh (shin) a tihhliam avang khan pre-season inbuatsaihna zawng zawng a lo hmaih vek tawh a, tun ṭuma a buaina pawh hi chu hliam bawk chu a rawn chhuah leh vang niin an ngai a ni. Scotland nena an inkhelh ṭan tur UEFA Nations League match-ah Slovenia tan hian a inlan thei dawn ta lo a ni.

He chanchin hian Slovenia ram chhung chanchinbu hrang hrangah lungawilohna leh mangan thuchhuah a siamtir hle a. Ekipa chanchinbu chuan, "National team chuan Manchester aṭangin medical documents an dawng tawh a, mahse tun dinhmunah chuan mipuite hriatah an puanzar theih loh bakah puanzar an duh rih lo a ni," tiin an tarlang a. Sesko-a hliam dinhmun kimchang chu Manchester United lamin an puanzar a ṭha ber tura an ngaih thu an sawi bawk.

Slovenia chanchinbu dang Football Mania chuan United-in Sesko chu an kaltir hma lutuk em tih zawhna zawtin, club lam chu uluk leh mawhphurhna nei zawk chunga player enkawl tur leh he thil thleng aṭanga inzir turin an phut a. "Player-in inkhelh a chak em emna leh a theihna pholang tura a tuihalna hi fimkhur zawka an enkawl a ngai a, a taksa theihnain a tlin loh chin thlen hmain an dan thiam a ngai a ni. 'Taksa theihna bak pela khelh' man hi a to lutuk a ni," tiin an ziak hial a ni.

Planet Football pawhin Sesko-a hliam leh ram tana hun rei tak goal a khung tawh loh dan chu rilru hah tak chungin an ziak a: "Nations League match paliah Slovenia chuan an chhawr thei dawn lova, hei hi team tan channa lian tak a ni tih sawifiah kual a ngai lo. Kan ram team hian an striker rinrawl ber hi hun rei tak an lo chhawr tawh lova, kum khat dawn ram tan match a khel tawh lo a, kum hnih dawn chu goal a khung tawh lo bawk a ni," tiin an sawisel bawk.

Slovenia forward Andraz Sporar chuan Sesko awm loh tur chungchang hi 24ur hnenah sawiin: "Benjamin-a theihna ang nei player thlak chu thil theih loh a ni. Mahse football hi mimal inkhelh a ni lova, team sport a ni a, Slovenia pawh hian player pakhat chauh a la innghat ngai lo a ni," tiin a sawi.

Manchester United leh Slovenia national team te tan Sesko hian a zawn zata hliam a tawh fo loh nan, chawlhhahdamna tawk tak a neih a, a hliam hi a zung chawpa a chinfel phawt chu a ṭul ber a ni chho mek a ni.