Manchester United head coach Michael Carrick chuan an captain Bruno Fernandes-a captaincy style chungchanga sawiselnate chu chhang letin, "kaihhruai dan hrang hrang a awm" tiin a hmualphokpui ta a. A hmaa manager hlui Ole Gunnar Solskjaer-a'n Fernandes-a chungchanga a lo sawi tawhte nen an ngaihdan a inang lo hle.
Como laka an tlawm hnuah Fernandes-a'n Carrick-a tactics chungchang chanchinbu mi hnena a sawichhuah avangin, Erik ten Hag-a'n captain armband a hlan hnuah a vawikhat nan tun kar chhung khan he Portuguese midfielder hian sawisel a tawk ṭan a ni. Hemi hnu Bournemouth an hmachhawn ṭum khan Carrick chuan Fernandes hi bench-ah a dah a, substitution vawi nga ngawt hmang mah se khelmualah a luhtir ta lo a ni. Mahse he buaina chungchang hi Carrington-ah inbiakna (clear-the-air talks) neih zui niin, an inkar buaina hi an chinfel tawh thu hriat a ni.
Kum 2023 nipui khan Erik ten Hag chuan Harry Maguire-a hnen aṭangin captain armband la hrangin, Fernandes hi United captain atan a ruat a. Maguire hi a hmaa manager hlui Solskjaer-a'n captain atana a lo thlan zawk a ni. Solskjaer-a'n he thutlukna a siam chungchang sawi fiahin, Fernandes chu "a changin a phur lutuk ṭhin a, inthununna a hloh ṭhin" avanga Maguire thlang zawk a nih thu a lo sawi tawh a ni.
Kar tawpa Chelsea an hmachhawn hmaa press conference-ah Carrick chuan Solskjaer-a ngaihdan chungchang hi hriattir leh a ni a, Carrick chuan midang ngaihdan nena in-compare a tum loh thu a sawi. "Ka ngaihdan chuan midang ngaihdan nena khaikhin vel hi a ṭul lo a ni," tiin Carrick chuan a sawi. "Ani hi kan football club captain a ni a. Mizia danglam tak tak leh team kaihhruai dan hrang hrang a awm a ni.
"A tawpah chuan khelmuala thil thleng leh chak leh chak lohah engkim a innghat vek a ni. Hetiang zawhna in min zawt hi ka hrethiam e. Ani hian he football club leh team hi a ngai pawimawh em em a, hlawhtling tura a tuihal zia a tilang bawk. Team hi kan pahnihin kan hruai dun zel ang," a ti bawk.
Como laka an tlawm hnua Fernandes-a thusawi khan dressing room boruak a tichhia em tih zawhna pawh Carrick chuan chhangin, team chhungrila inzawmna chu a nghet reng tih a sawi. "Team tan chuan inzawmna ṭha neih hi a pawimawh em em a. Tun dinhmunah thil engkim zawhna siam a awlsam em em tih ka hria a, mahse he thilah hian buaina engmah ka nei lo. Kan khelh ṭhat zawk a ngai a, thil ṭhenkhat kan tihchhuah ṭhat a ngai a ni. Kan inkar inzawmna hi a pangngai reng a ni," tiin a sawi.
Khelmual chhunga buaina bakah hian, United-in Italy-a Como an hmachhawn lai khan Fernandes-a chenna in chu rawk a ni a, club lam pawhin midfielder leh a chhungte hi an ṭawiawm hle a ni. Khelmual chhung leh pawha hun harsa tak a hman hnuin, Fernandes hi training-ah a "dinhmun ṭha ber" (best version)-ah a rawn kir leh tawh tih club hotute chuan an sawi bawk.
