Manchester United chuan an tlarhnung siamṭhat (defensive overhaul) nan ruahmanna an siam mek a, sum hman chhuah hmain ruahmanna tam tak tihpuitlin a ngai dawn a ni. Tun season-ah hian left-back thar lakluh hi an ngaihpawimawh ber a ni a, Newcastle player Lewis Hall chu an target ber a la ni reng a, hemi rual hian defence laili lamah pawh inthlakthleng a awm beisei a ni bawk.
Head coach Michael Carrick-a hnuaiah tunah hian centre-back rintlak mi panga an awm a, mahse an hmabak chungchangah zawhna zawt awm an la awm nual a ni. Harry Maguire leh Lisandro Martinez te chuan tun season tawpah an contract an hmang zo dawn a, club hian kum khat dang pawhsei theihna (option) nei mah se an hmabak a la chiang lo. Matthijs de Ligt pawhin a hnungzang hliam vangin thla 10 zet a chawlh hnuah a theihna rawn phochhuah nawn a ngai bawk a ni.
Rawlthar kum 20 mi Leny Yoro leh kum 19 mi Ayden Heaven te pawhin first-team-a inlan tam tumin Martinez-a te dinhmun an nawr ve mek a. Maguire hi March thlaah kum 34 a tling dawn a, United tan kumin nipui bazar hi a chhuahna tur hmun remchang a ni maithei. Chutih laiin Martinez-a hmabak erawh tun season-a chanchin langsar ber pawl a ni thung.
Argentina international hi Carrick-a hnuaiah fit a nih chuan chhawr ziah ni mah se, Old Trafford a pan aṭanga kum li chhungin hliamin a tlakbuak ziah chu an buaina lian ber a ni. Ajax aṭanga a zawm hnuah Premier League match 152 awm thei zinga 65 chauh a bul a ṭan a, January thlaah kum 29 a tling tawh dawn avangin contract thar hmu tur chuan fit taka a awm tlat a ngai tawh a ni.
Martinez-a pass ṭha tak tak leh midfielder-te, attacker-te tana ball pek chhuah (line-breaking passes) thiamna hi United tan asset hlu tak a ni a, fit reng thei nise chuan contract thar pek nan buaina a awm lo ang. Mahse he club-a a awm chhung hian kerek leh khup hliam na tak a lo tuar tawh ṭhin a ni.
United-in a thlaktu tur left-footed centre-back an zawng a nih chuan, Tottenham defender Micky van de Ven chu an target lian ber a ni ang. Van de Ven hi ball pass vak aiin ball khalh tlang (dribble) thiam mi a ni a, a tlan chakna hian tlarhnung venhimnaah leh tlarhma nawrnaah puihna lian tak a pe ṭhin. September 2024-a Old Trafford-a Spurs-in 3-0 a United an hneh ṭum khan, ball rawn tlantlangpuiin Brennan Johnson-a goal khung tur a siamsak nghe nghe a ni.
Kum 25 mi Van de Ven hian Tottenham-ah contract thar rei tak daih ziak mah se, United leh Liverpool te nen sawizawm a la ni reng a. North London club-ah season harsa a hmang a nih chuan club dang pan a hreh lo ang. Tun kar tawpah Old Trafford-ah inelna a awm dawn avangin, United scout-te hmaah a theihna phochhuahna hun ṭha a nei leh dawn a ni.
