Manchester United captain hlui Roy Keane chuan rawlthar theihna ngah tak JJ Gabriel-a'n Old Trafford chhuahsan a tum chungchangah United lam chu vui thei an nih loh thu a sawi a, anmahni ngei pawhin club dang lakah hetiang thil hi an lo ti fo tawh ṭhin tih a tarlang. Hei hi United head coach Michael Carrick-a'n kum 15 mi rawlthar hmabak chungchanga inbiakna neih mekah amah pawh a tel ve tih a nemnghet hnu lawka Keane-a'n a sawi chhuah a ni.
United academy star Gabriel hian Nilaini zana Carabao Cup third round-a Brighton & Hove Albion an hmachhawn ṭuma first-team tana a debut a siam hmain chhuah a duh thu a lo thlen hman a ni. United hian Brighton hmachhawn tur squad-ah Gabriel hi telh an lo tum lawk a, khelmualah inlan hman ngat se chuan kum 15 mi lek hi United chanchina first-team tana khel thei naupang ber a ni hial dawn a ni. Mahse tun kar tir lama mak taka chhuah a dil thut avangin a debut hi a siam ta lo a ni.
Kar liam ta khan Gabriel hian a Instagram profile-a a thlalak dah zawng zawng a lo delete vek tawh a, a chhan engmah sawi lova a awm hian mi ngaih a tiṭha lo hle a nih kha. Mahse club chhuahsan a lo duhna hian a chetdan danglam tak chhan chu a rawn hrilhfiah chho ta niin a lang.
'The Overlap' episode thara a inlan ṭumin, Roy Keane chuan United chu club dang aṭanga naupang an lo pawtchhuak fo ṭhin a nih avangin tun ṭuma Gabriel-a chungchanga an thil tawn pawh hi an tuar ve tawk reng a nih thu a sawi a ni.
Keane chuan, "United hian club dang aṭangin naupang kum 14 leh kum 15 mite an lo chhuhsak fo tawh ṭhin lo em ni? Club te zawk aṭangin an lo pawtchhuak ṭhin a ni lawm ni? Chuti a nih chuan in damdawi chu in in ve mai a ngai a ni. Kum 20 chhung zet chu United hian Wolves emaw club te zawk aṭangtein naupangte lakah hetiang thil hi an lo ti tawh ṭhin a, 'Ani hi chu kan la dawn' an ti mai ṭhin a ni," tiin tlang takin a sawi chhuak a ni.
Gabriel-a hmabak hian ni tlemte liam ta chhung khan chanchinbu hmai a luah hneh hle a, Real Madrid, Barcelona, Paris Saint-Germain leh Bayern Munich te chuan he rawlthar theihna sang tak hi lakluh tumin an ngaihven nghal em em vek a ni.
Nilaini zana Brighton laka an tlawm hnu press conference-ah, kum 45 mi head coach Carrick chuan Gabriel-a chungchanga chanchin thar zawh a nihin: "He thilah hian kan fimkhur hle a ngai niin ka hria. Ani chu rawlthar naupang te, kum 15 chauh a la ni a; keima ngaihdanah leh club thlirna aṭang pawhin, kan player naupangte enkawl uluk te, an ṭhatna tur leh an hmakhua ngaihtuah te hi kan thil dah pawimawh ber a ni a. Hetiang dinhmunah hian kan vai mai hian chu chu kan hriat chian a ngai takzet a ni," tiin a sawi.
Gabriel-a hmabak chungchang inbiaknaah hian Carrick chu amah ngei a tel em nge ni a club hotute kutah a dah tawp tih an zawh lehin, Carrick chuan: "A teuh lo mai, club ang zawng pawhin heng inbiaknaah hian kan tel vek a ni. Mahse, he thilah hian kan fimkhur a ngai hle tih hi ka sawi nawn leh duh a ni," tiin a chhang zui bawk a ni.
