Tun 2026-27 season tharah Manchester United midfielder Kobbie Mainoo chu a che ṭha takzet a, khelmual chhungah theihna thar nen a rawn inlar mek a ni. Premier League match hmasa pahnihah ropui taka a inlan hnuah, Sabah laka an inkhelhah pawh a theihna sang tak pholang chhunzawmin league-a midfielder ṭha berte zinga mi a nih zia a rawn lantir chho mek a ni.
First team-a a rawn inlan ṭan tirh aṭanga khel ṭha thei tak ni mah se, tun season-a a khelh dan erawh a danglam lehzual hle a, khawvel huapa player ṭha berte tluk pha tura sawi theih hial a ni chho mek a ni. Data MB-in a khelh dan an tehkhinna aṭang pawhin, season liam ta nena khaikhawkin Mainoo-a hmasawnna chu a hmuhnawm hle a, khelmuala thil engkim ti thei khawpa puitling (well-rounded) a nih tawh zia a lang chiang hle.
Manchester Derby hmasa ber an hmachhawn dawn hnaih lai hian, Mainoo hi tun season chhungin Premier League-a midfielder ṭha ber a ni hial mai thei a ni. Manchester City-in sum tam tak senga an lakluh Elliot Anderson (£116m) leh Enzo Fernandez (£125m) te ai pawhin a khel ṭha zawk nia ngaih a ni hial bawk. He kum 21 mi hian hun reilote chhunga hetiang khawpa hma a sawn theihna chhan hi United head coach Michael Carrick-a thawhrimna rah a ni a, tlar lailia Mainoo-a theihna zawng zawng chawikang tur hian Carrick hian nasa takin a pui a ni. United-in an lakluh thar Carlos Baleba nena an inkawp phei chuan hun rei tak chhung United midfield chu a nghet tawk hle dawn a ni.
Sky Sports chanchinbumi Danyal Khan-a nena an inbiaknaah, Michael Carrick chuan Mainoo-a hmasawnna chhan bulpui chu tawnhriat a neih tam tawh vang a nih thu a sawi.
Carrick chuan, "Tawnhriat neih hian kawng engkimah a pui chiang a ni; inkhelh zawn zela khelh dan phung (rhythm) neih nghet te, leh inrintawkna neih let te pawh a thlen bawk. Kobbie hi englai pawhin a hma sawn reng a. A kum ngaihtuahin a theihna la phawrh chhuah loh tam tak a la nei a, chu chu a beiseiawm em em bawk a ni.
"Kan thawhdun aṭang khan thil ropui tak tak a ti reng a, chu chu thil phurawm tak a ni. A theihna neih san zia ka hriatin ka phur hle a, kar leh thla lo kal turte leh kum lo la awm turah hian engtiang takin nge chu theihna chu a hman ṭangkai chhoh dawn tih hmuh ka nghakhlel hle a ni," tiin a sawi.
Kum 21 mi chauh la ni siin Mainoo hian league huapa midfielder langsar berte zinga mi a nih theih tawh phawt chuan, nakin zelah phei chuan a la ropui chho zual dawn tih Carrick-a thusawi hian a tichiang hle. Manager hlui Ruben Amorim-a hnuaia thla 12 chhung zet football mumal a khelh theih loh hnuah, hetianga khelmuala a theihna sang ber nena a rawn inlar leh thei hi Manchester United tan thil lawmawm tak a ni a, tunah chuan City nena derby match pawimawh an khelh hunah pawh United tana innghahna lian ber pakhat a ni tawh ang.
