Manchester United boss hlui Ruben Amorim chuan Serie A club lian AC Milan a enkawl meknaah, Sporting CP leh Old Trafford-a a lo paltlang tawh te nena tehkhinin club boruak leh pressure awmdan danglamna chu a sawichhuak ta.
International break a zawh hnuah AC Milan chuan ram chhung inelna Serie A an chhunzawm leh dawn a. Kum 41 mi Portuguese coach Amorim-a hnuaiah hian Rossoneri te chu Serie A match nga an khelh tawhah vawi thum chakin vawi hnih an inhnehtawk a, point 11 hmuin league-ah pangana (5-na) dinhmun an luah mek a ni. League-ah hian la tlawm lo mah se, a khelh dan phung (tactics) leh player a neih angte a chhawr ṭangkai tawk lo nia puhna avangin sawisel a tawk chho leh tawh hle.
Champions League league phase-ah pawh an mualah a club hlui Benfica lakah 2-0 ngawta an tlawm tak avangin sawiselna a tawk zual a. Hetih lai hian, a chhuahsan tak Manchester United pawh Michael Carrick-a hnuaiah Premier League-ah 12-na dinhmunah an awm mek a, Inrinni hian Tottenham an hmachhawn dawn a ni.
DAZN hnenah inkawmna a neihnaah Amorim chuan Sporting CP leh United-a a tawnhriat neih tawhte chu a sawi chhuak a. "Club dang aṭanga tawnhriat kan neih tawhte hian chona thar apiangah min ṭanpui ṭhin a ni," tiin Amorim chuan a sawi.
"Helaia (Milan) boruak hi chu Portugal nen a inang zawk hle a. Pressure danglam tak a ni, a chhan chu club pawn lama miten team hi phurna leh hmangaihna thuk tak neiin an thlir a ni. Hei hi Portugal nena an inanna a ni a, chutiang boruaka cheng chu ka lo ṭhanhnan tawh bawk a ni.
"England lamah erawh thil a danglam deuh thung. Manchester United hi khawvel huapa club lian (global club) a ni a, Milan ang chiah a ni bawk. Chuvangin i thiltih engkim mai hian nghawng a nei lian em em vek a, chu thil chuan Milan-ah hian ka theihna sang ber thehchhuak tura beih kawngah min pui a ni.
"Ka rilruah chuan, ka career chhunga ka thil lo tawn tawh zawng zawngte khan he club danglam bik tak pui thei tura inpeih tur hian he dinhmun hi min thlenpui a ni. Hun kal tawha tawnhriat ka lo neih tawh zawng zawngte hian he team nen hian hun ṭha leh hun harsa kan paltlang chhoh zelna turah min ṭanpui ngei dawn tih ka hria a ni," tiin a sawi zui bawk.
Sporting a enkawl lai khan kum 19 chhung zet Primeira Liga nomawi an lo lak tawh lohna chu titawpin, kum 2021 leh 2024 khan champion nomawi a lo chawipui tawh a ni. Hemi hnu hian Erik ten Hag-a hmunruak luahin Old Trafford a pan a, mahse chutiang hlawhtlinna chu a thlenpui thei ta lo. Bilbao-a Europa League final-ah Tottenham lakah an tlawm a, ram chhung inelna lama an chet chhiat chhunzawm zel avangin January 2026 khan United hian an ban ta a ni.
Kumin June thla khan Amorim hian AC Milan hi kum hnih daih contract ziakin a zawm a. United-a a awm laia kartin mai chanchinbu hmai lian ber an luah reng ṭhin lakah chuan Milan leh Sporting boruak chu tualchhung mipui phurna nena inzawm a ni zawk tih a chiang hle a, San Siro-ah hian Italy champion ni turin a insiamrem thei dawn em tih chu hunin a la hril ang.
