Manchester United manager hlui Ruben Amorim-a'n January transfer bazar-ah striker thar lakluh a tum mekna chuan United ruahmanna a nghawng buai mai thei dinhmunah a ding ta. Santiago Bernabeu chhuahsan tura sawi rik Real Madrid star Endrick chuan AC Milan zawm a remtih ve tak avangin, kum thar January thlaa Joshua Zirkzee-a club thar zawm theihna dinhmun chu a tiderthawng chho hle a ni.
Nipui transfer bazar liam ta chhung khan Manchester United chuan an midfield thuamṭhat ngai pawimawh hmasain Carlos Baleba, Youri Tielemans leh Andrey Santos te chu Old Trafford-ah an lalut a, goalkeeper Karl Darlow pawh free transfer-in an la bawk a nih kha. Chutih laiin tlarhma lamah erawh Joshua Zirkzee-a hmabak chu a chiang lo chho hle a, nipui bazar khar ni (deadline day) khan Everton lamah insawn teuh viau mah se, inremna mumal a awm theih tak loh avangin he deal hi a ṭhulh leh ta vek a ni. Hetiang dinhmun a nih mek lai hian, he Netherlands international striker hian Old Trafford a chhuahsan leh ngei ang tih thawm erawh a la reh thei lo thung.
Tun kar tir lam khan United boss hlui Ruben Amorim-a enkawl mek Italian club AC Milan chuan Zirkzee hi lakluh an ngaihven hle nia report a lo chhuak tawh a. Mahse Italian chanchinbu lar La Gazzetta dello Sport tarlan dan tharah chuan, Milan hian an mit chu Real Madrid forward Endrick lamah an len zawk ta a, kum 19 mi Brazilian striker pawh hian Serie A club lian hi zawm a duh zawk tih a lantir tawh bawk a ni. Milan lamin January transfer window a inhawng chiah tihah Madrid nen inremna siam theih ngei an inbeisei a ni.
Hetianga Amorim-a naute hian Endrick an lalut a nih chuan, Zirkzee-a hmabak chu a thim lehzual dawn ta a ni. A chhan chu tun dinhmunah hian amah ngaihventu club dang an awm rih tlat loh avangin, Old Trafford-ah hian a tang zui reng mai dawn em tih chu zawhna lian tak a tling ta.
United-a a hun hman mek hi Zirkzee tan chuan a duhangin a kal tluang lo hle a, season liam ta tir aṭang khan Premier League match-ah vawi nga (5) chiah bul a la ṭan a ni. Tun season-ah pawh match li (4) a inlan tawh na a, bul ṭan a la nei miah lo bawk. Chutiang dinhmun a nih lai chuan, Netherlands manager thar Xavi-a'n ram squad-a a ko tel ve hlauh chu amah ngei pawhin mak a tih thu a sawi chhuak a ni.
United-a a dinhmun chungchang sawiin Zirkzee chuan, "Tun dinhmunah chuan bench aṭanga substitute-a luh hi ka dinhmun a ni deuh ber a. Thil awlsam ni lo mah se keimah ngeiin he dinhmun hi ka siamṭhat a ngai a ni. Chuti chung chuan coach-in squad-a min ko tel ve hlauh mai kha chu ka tan thil mak tak a la ni reng tho mai," tiin a sawi.
Zirkzee chuan sawi zawmin, "Koh ka nih hi ka beisei lo hrim hrim a ni. Bul ṭan ṭhin player pawh ka ni si lo a, chuti chunga coach-in keimahah rinna nghata min ko chu ka lawm hle a, nuam ka ti hle. Mahse ka beisei loh tawp a ni thung," tiin a sawi bawk a ni.
