Manchester United chuan Premier League-ah bul an ṭan chhe hle a, match pasarih (7) an khelh aṭangin point 7 chauh an hmu a, 13-na dinhmunah an awm mek a ni.

Michael Carrick-a hnuaia Red Devils te hian Premier League match pasarih an khelh tawhah vawikhat chauh hnehna an la chan a, chu chu August thlaa Old Trafford-a Ipswich Town 5-2 a an hneh ṭum kha a ni. Tun season Premier League-ah vawi li (4) inhenhtawkin vawi hnih (2) an tlawm tawh a, Pathiannia Old Trafford-a Bournemouth an mikhual hmain an dinhmun a derthawng hle.

Inelna hrang hrangah match pasarih a zawnin hnehna an la chang lo a, top four chin aia point meuh ruka an hnufual tak avangin head coach Michael Carrick-a hmakhua pawh hriat a harsa chho ta hle. Red Devils te hian September thlaa Champions League-a Sabah an hneh hnu khan inelna hrang hrangah hnehna an la chang leh miah lo a ni.

Opta Analyst-in Manchester United-in English top flight-a bul an ṭan ṭhat dan chanchin leh data te an lakkhawm a. United-in an chanchina season bul ṭan ṭha ber an neih chu 1985-86 First Division campaign kha a ni a. Khatih lai khan manager Ron Atkinson-a hnuaiah a zawnin match 10 ngawt hnehna an lo chang tawh a ni.

Atkinson-a hnuaia game 10 a zawn a an chak tluang lai hian Manchester City, Newcastle United, Aston Villa leh Ipswich Town te chu an lo hneh tawh a, October 1985-a Luton Town nen 1-1 a an inhnehtawk khan an rekawd hi a tawp ta a ni. Atkinson-a naute hi match 10 a zawn a an chak lai khan pakhatnaah awm mah se, season tawpah erawh palina (4th) dinhmunah an tla thla a, a hnuah Atkinson-a hi Sir Alex Ferguson-a'n a rawn thlak ta a ni.

Premier League era chhung bera an bul ṭan ṭhat ber erawh 2011-12 season kha a ni a, manager ropui Sir Alex Ferguson-a hnuaiah a zawnin match 5-ah hnehna an chang a, Stoke City 1-1 a an inhnehtawk hnuah an chak rekawd a tawp ve leh ta a ni. Khatih season khan United hian pahnihna (2nd) dinhmun luahin an khar a, an elpui lian Manchester City chuan harsa takin Premier League title kha an lakpui ta a ni.