Season liam ta khan head coach Michael Carrick-a hnuaiah Manchester United chuan beisei lohtakin pathumna dinhmun luah mah se, kum 13 chhung zet Zawi tawh Red Devils-te hi tun season-ah an che chhe leh hle. Season ṭan aṭanga thla hnih chauh a la liam tihin, Premier League table chawhpawmawlin an awm a, Champions League lamah pawh an talbuai hle a ni. Kumin nipui aṭanga permanent-a ruat Carrick-a lakah hian pressure a sang tawh hle.
Club chhungah inringtawklohna leh intihthiamlohna a chhuak nasa a, player-te pawhin hotu lian zawkte an sawisel chhuak ṭan a ni. Midweek Champions League-a Como laka an tlawm nasat hnu khan an captain Bruno Fernandes chuan Carrick-a tactics a sawisel a, hemi hma kar khat lekah defender Lisandro Martinez pawhin nipui transfer bazar-a player a tawk a lak luh a ni lo chu club hotute lakah a vui thu a lo sawi tawh bawk a ni.
Martinez-a thusawiah khan thudik a awm thui hle. United hian season liam taa an hlawhtlinna chhunzawm nan squad thuam chak tak tak ngai mah se, nipui transfer window chhung khan midfielder pathum - Carlos Baleba, Youri Tielemans leh Andrey Santos te chauh an lalut a ni. Tlar laili an thuam chak hle laiin, tlarhnung lam erawh an thlahthlam thung a, hei hian harsatna lian tak a thlen ta a ni.
A bikin left-back hmun hi chinfel hmasak ngai a ni a. Kum 31 mi Luke Shaw-a chhah chhuah turin bul an ṭan a, mahse hei hi a fuh lo hle. Director of football Jason Wilcox leh Ineos-te chuan he position hi thuamchak an tum mek a, Newcastle left-back Lewis Hall chu an lak luh tum ber zinga mi a ni char char a ni. Kum 22 mi England international Hall hian Manchester pan hi a chak tawh hle a, United hian Newcastle fiah thar leh an tum ang. Shaw-a contract hi kum khat chiah a bak tawh avangin leh hliam a tawrh ngun avangin, kum 12 chhung club tana a thawhhlawkna avanga lawmthu hrilh chunga kumin nipuia hralh zui mai hi an ruahmanna a ni.
Central defence lamah pawh siksawi hna thawh a ngai hle. Atletico Madrid laka red card hmu mah se Leny Yoro chu a puitling chho hle a, Matthijs de Ligt pawh a fit a nih chuan defender ṭha tak a ni. Kum 33 mi Harry Maguire pawh hralh an tum lo a, dressing room-a rawlthar Leny Yoro leh Ayden Heaven te kaihruai tu tura mawhphurhna pe in, a contract-a kum khat pawhsei theihna option hi hman zui an tum a ni.
Chutih laiin, club laka vui thu sawitu Lisandro Martinez erawh hralh an tum hle. Kum 28 mi Argentina international hi Atletico Madrid leh Spanish club ṭhenkhatin an ngaihven a, amah pawhin La Liga pan a chak hle a ni. A contract hian kum khat chiah hmabak nei tawh mah se, United hian kum khat pawhsei theihna hmangin a manah sum hmuh chhuah an tum dawn a ni.
Martinez-a hmunruak luah tur hian Everton defender Jarrad Branthwaite chu lakluh leh an tum mek. Kum 2024 khan United hian £50m thlenga dawrna hi vawihnih an lo thehlut tawh a, mahse Toffees-in an lo hnawlsak tawh a ni. Kum 24 mi, ke veilam hmang thiam Branthwaite hi Premier League tawn hriat ngah tak leh England national team-a koh hlim a nih avangin United tlarhnung thar atan a remchang em em dawn a ni. Right-back-ah Diogo Dalot leh Noussair Mazraoui te buaipui ngai lutuk an nih loh avangin, player pahnih (Hall leh Branthwaite) laluta player pahnih (Shaw leh Martinez) an hralh chuan Carrick-a naute tlarhnung chu a chak tawh hle dawn a ni.
