Manchester United head coach Michael Carrick-a dinhmun chu a derthawng chho hle a, Pathiannia mahni mual Old Trafford-a Bournemouth an hneh zo lo a nih chuan ban theih dinhmunah a ding mek a ni. United hotute pawh Carrick-a ban a nih thula a thlaktu tur zawn kawngah ngaihdan inang lo neiin an insemdarh mek bawk.
Nilaini zana Champions League inkhelah Como laka 4-1 ngawta an tlawm hnuah Carrick hian a hna a la chelh hram hram a; mahse, United hi a zawnin match sarih chhung chak nei tawh lovin an awm a, tun season chhung match 11 an khelh tawhah vawi hnih chiah hnehna an la chang a ni. Harsatna zawng zawng hi kum 45 mi Carrick-a thiam loh vek a ni lo tih pawm mah se, khelmuala an khelh dan phung a beidawnthlak em avangin club chhungrilah a hmabak chungchang hi an sawiho nasa tawh hle a ni.
Carrick-a thlaktu tur chungchangah hian director of football Jason Wilcox chuan Premier League-a lo fiah tawh manager lakluh a duh a. Wilcox-a duh ber chu kum 33 mi Brighton boss Fabian Hurzeler a ni a; mahse, Hurzeler hian tun dinhmunah Old Trafford pan a chak loh bakah Seagulls lamin a chhuah zalentir nan zangnadawmna sum tam tham tak an phut dawn a, chu sum chu United-in an nei mai rih lo a ni. Chutih rualin Wilcox-a rilru la tu dang chu Newcastle aṭanga chhuak ta, hna la nei lo Eddie Howe a ni a, Howe-a'n St James' Park leh Bournemouth-a a lo thawh tawh dante chu Wilcox hian a ngaisang hle a ni.
Kawng lehlamah, director of recruitment Christopher Vivell chuan Julian Nagelsmann-a hming a rawn chhawpchhuak ve thung. Germany manager hlui, Bayern Munich pawh lo enkawl tawh Nagelsmann hi World Cup zawh hnu khan a awm awl mek a, club neitupa Sir Jim Ratcliffe-a it zawng tak a ni bawk.
Como laka an tlawm ṭum khan United tan a zahthlak zualna pakhat chu, Como captain Lucas Da Cunha a che ṭha em em kha a ni. He kum 25 mi French international hi Ratcliffe-a hnuaia Ineos club Nice leh Lausanne-Sport-ah te lo khel tawh ṭhin a ni a; kum 2023 khan Dave Brailsford-a kaihhruaina hnuaiah €700,000 lek senga Como hnena hralh a lo ni tawh a ni. Mahse tunah chuan khawvel club lianten an ngaihven tawhin, a manah £50m vel hial chhiar a ni tawh a, hei hian Ineos-in player an teh fung a fuh tawk lo ṭhin zia a tarlang nawn leh a ni.
Champions League-a an khelh dawn hian United chuan an squad zinkawng zawh tur an puan ṭhin chu an titawp a. Hei hi khingpuiten an squad hriat lawk vanga hlawkna an lo tel ve theih danna tura an tih a ni a, UEFA danah match hma ni training minute 15 chhung tarlan phal a nih rualin, zin tur squad puanzar kher a ngai lo a ni.
Como mualah hian boruak a rit zual hle a, Bruno Fernandes-a'n khelmuala an khelh dan taktika a lungawi loh thu a sawi chhuah bakah, inkhelh zawhah Carrick chuan khualmuala kal fan-te hnenah ngaihdam dil mah se, dressing room-ah erawh a player-te zawk a sawisel ve thung a. Carrick hian he hmunah hian a hun a tawp dawn hnai tawh tih hria niawm takin, a player-te theihna tlem lutuk chu thup miah lovin a phawrhchhuak a ni.
