Pathianni tlai dar 4:30 hian Premier League-ah Manchester United chuan Manchester City chu Old Trafford-ah an mikhual dawn a, inelna hrang hrangah a zawnin hnehna vawi hnih lak an tum ang. Hetih lai hian khelmual pawn lamah erawh, ticket hralh chhawn chungchanga chhui zui mekah United hotute chet dan avangin club ṭantute lam aṭangin lungawi lohna a chhuak nasa hle a, ticket nei nghet (season ticket holder) 685 zet hrem an nih tak avangin kumin nipui aṭang tawh khan thawm a ṭha lo tawh hle a ni.
Manchester derby vawi 199-na lo thleng turah hian United fan pawl lar tak 'The Red Army' (TRA) chuan Stretford End-ah puanzar (flag) mawi taka zar ṭhin chu an zar dawn loh thu an puang ta a. Chu ai chuan players tunnel chung lamah club neitute, director-te leh thutlukna siamtu hotute tana thuchah chiang tak kengin: "Min cheibawl dan hi a zahthlak takzet (The way you treat us is a disgrace)" tih inziahna banner lian pakhat an tar dawn a ni.
TRA chuan X (Twitter)-a thuchhuah an siamah, "Pathianni hian The Stretford End-ah flag display engmah a awm dawn lo. A aiah players' tunnel chungah Manchester United neitute, director-te leh thutlukna siamtu hotute tan thuchah chiang tak kengin: 'MIN CHEIBAWL DAN HI A ZAHTHLAK TAKZET' tih banner a inkhai ang," an ti.
An thuchhuah chuan a sawi zawmnaah, "Hei hi 'TRA' thuchah chauh a ni lo va; club chet dan avanga nghawng chhe tawk leh min rawn be ṭhintu fan group dik takte, khelmuala match en ṭhin supporter-te, supporters' club leh fan aiawhtute zawng zawng aiawha thuchah a ni. Kan football club thinlung pawimawh ber – chhuan tam tak khelmuala match en tura lo kal tawh ṭhin supporter-te'n hriatpui kan phutna aw a ni," tiin an tarlang.
He buaina hi Manchester United buaina chauh ni lovin, league pum huapa buaina a nih thu leh, thutlukna siamtute'n football hmakhua an thlir danah inthlak danglamna lian tak a awm loh chuan khelmuala inkhelh inelna boruak hian zualko a neih tawh dawn loh thu an sawi bawk. TRA chuan, "TRA hi lungawi lohna lantir satliah pawl kan ni lo va, boruak siamtu 'atmosphere' group kan ni. Mahse khelmuala en ṭhintute tana pawi tur a nih chuan kan dinhmun tarlan hi kan ṭhulh ngai lo ang," an ti.
Hemi rual hian banner an tar tur chu player-te beihna a nih loh thu chiang takin an tarlang a, Pathianni derby match aṭanga ṭanin khelmual chhungah chuan player-te leh manager chu theih tawp chhuaha an thlawp zui zel dawn thu an sawi a ni.
'Talk of the Devils' podcast-a Andy Mitten-a'n a tarlan danin, Ningani zana Sabah FK laka 4-0 a United an chak ṭum khan inkhelh zawhah fan eng emaw zatin Old Trafford-ah hun hmangin, inkhelh hmaa an vai zawh hnuah flag zawng zawng an khawnkhawm vek a ni. Heng flag-te hi Pathianni derby thleng khelmuala dah reng theih a nih laiin, lak khawm vek a nih chhan pawh he lungawi lohna lantir an tum vang hi a ni.
United ṭantu, kum tin home leh away-a team zui kual ṭhintute chu ticket man to tial tial te, sumdawng hausa tana thutna (corporate seating) siam zau nana hmun sawnsak an nih te, leh ticket to lutuk avanga khelmuala kal thei lo khawpa nawr chhuah an nih avangin an lungawi lo hle a. Old Trafford-a boruak ropui tak siamtu ber fan-te hi club hotute'n an hrethiam lo a nih chuan stadium ropuina leh a nihna dik tak chu a hloh tial tial dawn nia ngaih a ni.
