Pathianni zan hian Premier League inelna hnuaiah Manchester United chuan an khelmual Old Trafford-ah an elpui lian Manchester City an mikhual dawn a, hei hi club pahnihte inhmachhawn vawi 199-na chiah a ni ang.

Manchester United hian tun season match thum an khelh tawhah point li an hlawhchhuak tawh a, league-a kaisang thar Ipswich Town lakah chiah hnehna an la chang rih a ni. Mikhual lam Manchester City erawh manager thar Enzo Maresca-a hnuaiah a vawikhat nan Old Trafford an pan dawn thung a, inelna hrang hrangah match li an chak tawh avangin bul ṭan ṭha viau mah se, Bournemouth leh Coventry City laka an chet dan erawh a la tluang tawk lo hle tih a lang.

Manchester Derby vawi 199-na kan hmachhawn hma hian hriatzauna leh chhinchhiah tlak thil pawimawh pangate chu:

1. Derby hmasaber leh inelna chanchin:

Manchester derby hmasaber hi October 1891 khan FA Cup inelnaah khelh a lo ni tawh a, khami ṭum khan United hian City chu 5-1 ngawtin an lo sawp a nih kha. Kha kha City laka United hnehna 81 an chan zinga a hmasaber a ni a; chumi hnuah United hian vawi 55 draw neiin, vawi 62 an tlawm tawh thung. January thlaa City an hneh tawh hnuah, Pathianni hian United chuan 2008/09 leh 2010/11 season inkar hnua a vawikhat nan mahni mualah City lakah a zawnin vawi hnih chak theihna hun remchang an nei dawn a ni.

2. Michael Carrick-a record siam theihna dinhmun:

Head coach Michael Carrick hian kum 113 chhunga United manager zinga mahni mual (Old Trafford)-a a league derby hmasa pahnih hnehna chang thei hmasa ber nih theihna hunṭha a nei a. Mahse, City hian tun hnai kum eng emaw zat chhung khan Old Trafford-ah sulhnu ṭha tak an nei thung a, United hian mahni mualah City an tum hnuhnung 11 zinga vawi thum chiah hnehna an la chang a ni. Carrick hian Sir Alex Ferguson-a hnuaia midfielder a nih laia Old Trafford chu kulhpui nghet tak a lo nih ṭhin ang khan siam leh ngei a duh ang.

3. Rooney-a goal khung tam ber record:

Manchester derby chanchina goal khung hnem ber record chu Wayne Rooney-a kawl a ni. Rooney hian United tana a khelh chhungin City lakah match 31 a inlan a, goal 11 ngawt a khung a ni. A dawtah hian Joe Hayes (goal 10), Francis Lee (goal 10) leh Sergio Aguero te an awm bawk.

4. Ryan Giggs-a hnehna chan tam ber record:

English football chanchina nomawi chawi hnem ber Ryan Giggs chu derby-a chak hnem ber record kawltu a ni a. United tana a damchhung hun zawng hmangtu Giggs hian derby match 36 a khelh aṭangin vawi 16 ngawt hnehna a chang thei a, he record hi tuman an khum mai a rinawm loh hle a ni.

5. Enzo Maresca-a fiahna hmasaber:

Maresca hian Chelsea a enkawl lai khan United hi vawi thum a lo hmachhawn tawh a, mahse he inkhel hi Manchester derby-a head coach anga a inlan vawikhatna tur chiah a ni ang. Leicester City leh Chelsea boss hlui hian an club chanchina league derby hmasa bera hnehna chang thei manager pariat (A.H. Albut, John Bentley, Kevin Keegan, Sven-Goran Eriksson leh Pep Guardiola te tiamin) zinga tel ve theihna chance a nei a ni. Carrick pawh hian kumin tir lam khan lailawk (interim) a United a enkawl ṭan tirhin a derby match hmasa berah City lakah hnehna a lo chang tawh a nih kha.