Manchester United striker Joshua Zirkzee chuan Old Trafford-ah hun a nei tlem hle tawh niin a lang. Kum 2024 nipui bazar lai khan Bologna aṭangin Theatre of Dreams hi a pan a, Premier League-ah a chet ṭhat nghal zung zung beisei ni mah se, English football kalphung chu a la zawm hleithei meuh lo a ni.
He Dutch striker hian manager hlui Erik ten Hag-a hnuaiah hmun a chang mang lo a, Ruben Amorim-a lo luh hnuah pawh a dinhmun a ṭha phah chuang lo. January thlaa Michael Carrick-a'n mawhphurhna a rawn lak hnuin United hian hma sawn chho viau mah se, Zirkzee-a theihna erawh an chawisanpui hlei thei lo thung a ni. Kum 25 mi striker hi squad-ah a langsar lo hle a, tun season chhung hian match bul ṭan a la nei lo hrim hrim bawk.
Tun season 2026-27 chhung hian Zirkzee hian Premier League-ah vawi hnih substitute-in inlanin minute 20 chiah a khel a, EFL Cup-ah vawi khat inlanin minute 24 leh Champions League-ah vawi khat inlanin minute 26 a khel bawk a, inelna hrang hrangah match li inlan tawhin minute 70 chauh mual chhungah hun a la hmang a ni.
Kumin nipui bazar lai pawh khan chhuak mai tur anga sawi a ni nasa hle a, ngaihventute zingah Napoli pawh an tel a nih kha. Transfer window khar a nih hmain engmah puitling chhuak lo mah se, January thlasik transfer bazar inhawng turah he Italian club hian he Dutch forward hi an dawr nawn leh maithei tih thawm a awm chho leh ta a ni.
Area Napoli tarlan danin, Napoli sporting director Giovanni Manna chuan Zirkzee hi Serie A-ah hruaikir leh a la duh hle. He chanchinbu hian, "Joshua Zirkzee hi an tlarhma thuamchak nana Napoli transfer bazar-a an lak luh tum berte zinga mi a ni a, Massimiliano Allegri-a naute tana theihna thar leh tactics remchang zawk rawn thlentu tur ṭha berah an ngai a ni," tiin an tarlang.
Sawi zawmin, "Tuna Manchester United-a khel mek Dutch striker hi sporting director duhzawng tak a ni char char a. Giovanni Manna hian striker dang pakhat la duh Allegri-a duhthusam tihpuitlinsak a duh a ni," an ti bawk. Napoli hian United lam bakah player aiawhtute an lo be tawh niin an tarlang a, Zirkzee pawh hian Bologna-a a lo larna ram, Italy leilung rah leh hi a hreh lo hle nia hriat a ni.
Thudawnnaten an tarlan zel danin, United pawh hian Zirkzee hi loan hmanga chhuahtir an inpeih reng a, chu chu Napoli sum dinhmun nen pawh a inmil viau ang. Amaherawhchu, kum khata a hlawh zat €4.3 million vel hi Napoli tan buaina a la tling thei a, inbiakna neih a ngai dawn a ni. Allegri chuan he Dutchman hi Rasmus Højlund nena inkawp thei tur leh, tactical danglamna siam theitu player ṭha takah a ngai hle bawk.
November thla chawlhkar hmasa lam aṭang hian club hnihte hian inbiakna an ṭan rin a ni a, Napoli bakah hian Italian club lian Juventus pawhin an lo hel ve reng bawk. Hetih rual hian Zirkzee-a chhuah theihna hian United chu Crystal Palace striker Jean-Philippe Mateta lakluh an tumna kawngah a pui thei dawn bawk niin report chuan a tarlang a ni.
