Tun kar tir lam khan Denmark nena Nations League match an khelh ṭumin, Bruno Fernandes chuan Cristiano Ronaldo aiawhin Portugal captain nihna a chelh.

Kar liam taa Norway laka 2-1 a an chak ṭuma kum 41 mi Ronaldo a inlan loh hnu khan, head coach Jorge Jesus nen an inkar a ṭhat loh tak avangin Ronaldo hian Portugal camp a chhuahsan a nih kha. Ani a awm loh hlan hian Manchester United captain Fernandes chuan mawhphurhna lain, Ningani zan khan Nations League-ah Denmark lakah 4-2 a hnehna an chan theih nan an ram chu a hruai ta a ni.

He inkhelah hian Fernandes chuan chance panga ngawt siamin (pitch-a siam hnem ber niin) assist vawi hnih a nei a, Portugal tana hruaitu pawimawh ber a ni thei tih a pholang chiang hle. Norway an hmachhawn leh hmain Fernandes chuan boruak ṭha lo tak karah chhuak mah se, Cristiano Ronaldo chu an ram tana football entawn tluk ropui ber a la nih reng thu a sawi a. United leh Real Madrid superstar hlui nen hian inbiakna an neih thu kum 32 mi hian a puangzar bawk.

BBC kaltlanga a sawi danin Fernandes chuan, "Cristiano chungchangah chuan, a hnenah inbiakna ka lo nei tawh a. A hnena ka sawi leh helai hmuna ka sawi nawn leh tur chu, engpawh thleng se, Portugal chauh nilova khawvel pum huapa a thil lo tih tawh zawng zawng avang hian, Cristiano Ronaldo hi kan national team, kan football leh kan ram tana chhinchhiahna ropui ber a nihna a bo ngai lovang," tiin a sawi.

Portuguese attacking midfielder hian pawn lam aṭanga sawi neuh neuh leh boruak awmte chu engpawh nise, ram squad chhungah inṭhenna engmah a awm loh thu a sawi chiang hle bawk.

Fernandes hian a kawng (hip) hliam a neih avangin Norway nena an inkhelh hmasa zawk pawh kha a lo khel thei lo tawh a, Denmark lakah pawh hian a inlan theih a rinawm loh hman hle a nih kha. Mahse dam chhuak lehin, Copenhagen-a an inkhelhah minute 25-naa Goncalo Ramos-a goal thun tur a siamsak a. Mahse Jesus chuan a captain lakah beiseina a la neih san avangin, half-time-ah a theihna thehchhuak zual turin a fuih thung.

Jorge Jesus chuan, "First half ai khan second half-ah Bruno Fernandes hian a khel ṭha zawkin ka hria. Half-time-ah khan he team hian a theihna a mamawh belh thu ka hrilh a. He position-a khelte lakah hian thil tam tak ka phut ṭhin. Thil a kal fuh tawk lohva ka hriat chuan ka sawi chhuak mai ṭhin a ni. 'I tih loh chuan inkhelh hi a famkim thei dawn lo,' tiin ka hrilh a. Second half-ah chuan a khel ṭha zawk hle a, Vitinha hnenah pawh pass ṭha tak a pe bawk a ni.

"Tumah awm lohna hmun ruak anga lang, mahse chutiang hmuna lo awm dan thiamte tan phei chuan a chet dan kha a pawimawh em em a, second half-ah khan a khel ṭha takzet a ni," tiin Fernandes-a chet dan chu a fak zui bawk a ni.