Manchester United manager Michael Carrick chuan tun season-a a tactics hman dan avangin a hna a chan mai theihna dinhmun hlauhawmah a inhnuklut mek tih hrilh a ni a, United hian an midfielder hlui Casemiro thlaktu tur an la hmu zo lo hle nia tarlan a ni bawk.

Carabao Cup-ah si hnih faia hma an hruai hnuah Brighton laka 3-2 a an tlawm tak avangin Carrick-a hmabak chungchang hi sawi a hlawh chho hle a. Mi 10 chauh khel Manchester City laka an tlawm hnuah inrintawkna neih let tumin ṭan la mah se, second half-ah Brighton lamin an rawn umphak a, match a tawp meuh chuan Old Trafford-a mahni mual ṭantute au elna (booing) an tawk hial a ni.

United striker hlui Louis Saha chuan Betano hnenah inbiakna a neihpuinaah Carrick-a tactics hman dan chu ngawrh takin a sawisel a, insiamṭhat ngaihna laite a kawk chhuak bawk. Saha chuan, "Tun season-a Manchester United buaina hi player-te vang a ni lo. Benjamin Sesko khan hliam avangin pre-season a hmang ṭha thei lova, World Cup khelh zawha squad rawn zawm leh tur player ṭhenkhat an lo kir har bawk a ni. A nihna takah chuan nipui transfer window kha Manchester United tan chuan bazar ṭha a ni lo hrim hrim. Mahse Michael Carrick hian a khelh dan phung hi a inthlakrem (adapt) a ngai a ni.

"Team-ah hian phurna leh nung sarh hmuh tur a awm lova, Manchester United hian football ṭha an khelh theih nan inkhelh dan phung (system leh patterns) mumal an mamawh a ni. Tun dinhmuna an khelh dan phung hi Michael Carrick-a tan a hlauhawm hle, a chhan chu he buaina hi player-te vang liau liau a ni lo tlat. Matheus Cunha, Bryan Mbeumo leh Bruno Fernandes-te pawhin team khelh dan phung zalen leh chak zawk an mamawh a, mahse an khelhpuite'n chu chu an pe thei rih lo a ni," tiin a sawi.

Saha chuan defensive midfielder pahnih chu ball tlanpui muang lutuk leh sir lam chauhva inpass kual ṭhina puhin, tlarhma tan forward pass ṭha an pe chhuak lo niin a tarlang a. Transition-ah an muang lutuk a, Marcus Rashford-a tlan chakna pawh hmang ṭangkai lovin an che muang hret ṭhin niin a sawi bawk.

Nipui transfer bazar chhung khan United hian tlar laili thuam nan sum tam tak an seng a, Youri Tielemans, Andrey Santos leh Carlos Baleba te lakluh nan £155million lai an hmang a nih kha. Chuti chung chuan Saha chuan kumin nipuia a thlawna chhuak Casemiro an chan chu United tana nghawng na ber a nih thu a sawi a ni.

"Ole Gunnar Solskjaer-a lo tlukchhiat tawhna ang pumpelh tur hian Carrick hian eng nge a tih ang? Team-ah hian khelh dan phung thar leh phurna a thlen a ngai a ni. Player ṭhenkhat theihna pangngai aṭangin lo chhuak mah se, a bak zawng chu manager hnen aṭanga rawn kal tur a ni. Season liam ta khan chu chu Casemiro-a hnen aṭanga lo chhuak a ni ṭhin a, mahse a thlaktu tur an la hmu zo lo a ni," a ti.

Saha chuan Casemiro chungchang sawi zelin, "Mi ṭhenkhat chuan khelmualah tha a nei tawh lo an ti a, mahse tunah hian United-in eng nge an chan tih hi en ta che u. Ani chu team phurrit la kantu leh phurna petu ber a ni ṭhin a. Khelmual chhungah inrintawkna a pe a, hun ṭha bawhpelh lovin risk la ngam mi a ni. Chuvang tak chuan midfielder ropui a ni reng a, team-ah balance ṭha a rawn thlen ṭhin.

"Tunah chuan manager a nihna angin he balance hi Michael Carrick-a'n a pek a ngai a ni. Carlos Baleba hi hliam aṭanga a lo dam chhuah hunah heng thilte hi a rawn thlen theih mai ka beisei a, chu chuan Bruno Fernandes chu striker-te tana chance siamsak turin kawng a hawnsak thei ang. United hian team chawkphur thei, ball chhuhsak a, tlan chakte pe thei tu leh mipui chawk tho theitu player danglam tak an mamawh a, an tlar lailiah player che rang leh thluak fing tak an mamawh takzet a ni," tiin a tlip bawk.