Brentford forward Kevin Schade lak tumin January transfer window-ah Manchester United chuan Premier League club lian Arsenal leh Liverpool te an el dawn nia report a ni.

Tun season Premier League bul an ṭan dan a muan em avangin, Manchester United chuan January thlasik transfer window (winter transfer window) lo inhawng turah squad thuamchak nan hma lak an tum ṭan ta a. Kumin nipui transfer window chhung khan Red Devils hian an tlar laili (midfield) thuam chak lam chauh an ngaihtuah a, tlar laili thuam nan chauh an rilru leh tha an sen nasat lutuk avangin, khelmual hmun dang thuam ṭhat nan hun leh sum leh pai an nei tawk ta lo a ni.

Nipui bazar chhung khan midfield thuam chak nan hun leh tha an sen zawh vek tak avang hian, tlarhma lam leh hmun pawimawh dangte thuam chak hman lovin an transfer window an khar ta a. Chu chuan tun season ṭan tirh lamah United chu harsatna a siamsak a, season bul an ṭan fuh tawk loh phah hle a ni. Chuvang chuan thlasik bazar lo thleng turah hian khelmual hmuna tlar hma lam thawmṭhat leh thuam chak chu an thil ngaih pawimawh berte zinga mi a ni ta hial a ni.

He tlarhma thuam chak tumna kal zelah hian Brentford tana tlan chak em em Kevin Schade chu United hian an ngaihven ta a. Mahse he Brentford forward lak tumna kawngah hian Old Trafford club hian hna awlsam tak an hmachhawn dawn hauh lo. Schade hi Premier League-a an elpui lian tak tak Arsenal leh Liverpool te pawhin January transfer window-ah lakluh tumin an lo chhaih ve mek bawk a ni.

Brentford tana theihna pho chhuak ṭha tak Schade-a tlan chakna leh hlauhawmna hian club lian te mit a la hle a. United tan chuan tlarhmaa chakna leh thahruai thar pe theitu tur player mamawh tak an nih laiin, Arsenal leh Liverpool te ang bawka he Brentford speedster chhuhsak tumtu club lian dang an awm ve tlat avangin, January thlaah hian Kevin Schade-a man inchuhna boruak hi a alh chhoh hle a rinawm a ni.

United hian nipui laia an tihhawn theih loh tlarhma hmun ruak hi January-ah hian an hnawhkhat thei dawn nge, nge ni a Arsenal leh Liverpool te hian he Brentford forward hi an lak khalh zawk dawn tih chu thlasik transfer window inhawn hunah a langchiang chho ang.