Nipui liam ta transfer window chhung khan Manchester United-in an lakluh ngei tura mi tam takin an lo beisei zinga mi chu French midfielder Manu Koné a ni.

Khang hun lai vel khan United-in an midfield thuam ṭhat an tum zia chu mi zawng zawng hriat a ni a. Casemiro-a thlaktu tur zawn bakah, captain Bruno Fernandes leh Kobbie Mainoo te nena khelmual laili luah dun thei tur midfielder tha an mamawh em em a ni.

A tirah chuan Real Madrid midfielder Aurélien Tchouaméni chu Red Devils hian lak an tum berte zinga mi ni mah se, a man leh dinhmun a khirh em avangin a ram pui Koné lam hi an hawi ta zawk a nih kha. Koné hi season liam ta khan Europe khawmualpuia midfielder khel ṭha berte zinga mi a ni a, World Cup-ah pawh khan France squad-ah Tchouaméni hmunruak luahin khelmual lailiah a che ṭha em em a, mi tam tak mit a la hle a ni. Hemi hnu hian Roma chhuahsana United pan mai tur anga sawi a ni ta reng bawk.

Mahse, United chuan midfield thuam ṭhat tumin Chelsea aṭangin Andrey Santos, Aston Villa aṭangin Youri Tielemans leh Brighton aṭangin Carlos Baleba te an la fel ta zawk a. Heng player thar an lakluh tak avang hian kum 25 mi Koné-a tana Old Trafford pan theihna kawng chu a inpingdang ta a ni.

Chuvang chuan he French international hi Serie A club Roma-ah hian a la cham zui rih a, tun season bul pawh a ṭan ṭha hle a ni. Serie A match nga a khelhah goal hnih khungin, match khatah rating 7.3 lai a nei thei a ni. Roma pawh hian Koné an la kawl zui theih hi vanneih vang liau liau a ni tih an hria a, Europe club lianten an rawn hel leh vat dawn tih an hai lo hle.

Italian chanchinbu lian Gazzetta dello Sport chuan Roma dinhmun tarlangin, "Nipui liam ta khan Giallorossi (Roma) hian Chelsea-in Koné man atana €60m dawn an thehchhuah chu an lo hnawlsak a (chumi hma phei chuan Atlético Madrid dawrna €45m bakah bonus pawh an lo hnawl tawh bawk). Tunah chuan Koné man atan hian €100m lai an phut tawh a ni. A to lutuk nge to lo chu ngaihtuah tham tak a ni," tiin an ziak hial a ni.

INEOS lamin Koné hi lakluh tum ber pakhat atan lo nei tawh ṭhin mah se, Roma-in a man atana €100m zeta sang an phut tak tlat avang hian United hian an bawhzui leh kher a rinawm tawh loh a. Midfield lamah player thar an lak tawh bawk si avangin a man to tak seng a lakluh leh chu thil theih loh tluk a ni tawh maithei a ni.

Amaherawhchu, football khawvelah engpawh a thleng thei a; he French midfielder hian Serie A-ah theihna sang a pholang chhunzawm zel a nih chuan, English champion vawi 20 ni tawh United hian an ruahmanna ennawn lehin sum tam tak sengin Old Trafford-ah an la lut leh thut thei bawk a ni.