Manchester United captain Bruno Fernandes chu match li chhung zet goal khung emaw assist nei lova a awm hnuah, a chhan bulbal chu Portugal manager Jorge Jesus chuan a tarlang a, kum 31 mi midfielder hi hliam tuar chungin a lo khel char char tih a nemnghet a ni.

United captain a chet ṭhat theih loh chhung hian Red Devils pawhin hun harsa tak an tawng chho mek a, Premier League match 5 an khelh tawhah 12-na dinhmun chauh luahin, hmahruaitu Manchester City lakah point 10 ngawtin an hnufual tawh a ni. He hun buaithlak tak an paltlang mek lai hian Fernandes-a contract chungchang pawh sawi zui a hlawh thar leh a, kum khat dang pawhsei theihna (option) United hian kawl mah se, a contract neih lai hi kum khat aia tlem chauh a nung tawh a ni.

Chanchinbumite hmaah Jorge Jesus chuan Fernandes hi United aṭangin Portugal camp a rawn luh tirh aṭang rengin hliam a nei sa tih sawiin, a hliam lai tak sawi lang kher lo mah se a khelh ṭhat theih loh chhan lian ber a nih thu a sawi chiang hle. Jesus chuan, "Match thum liam ta chhung khan hliam na tuar chungin a khel char char tih min hrilh a, hei hian a ti buai hle a ni. A theihna pangngai a phochhuah theih loh chhan lian tak pakhat chu a ni," tiin a sawi.

Fernandes-a chet ṭhat theih loh chhung hian Old Trafford club hian hun harsa tak an paltlang zui a. Old Trafford-ah EFL Cup third round-ah Brighton & Hove Albion lakah 3-2 in an tlawm a, chu mai bakah Fernandes-a'n goal leh assist a neih lohna league match pali-ah hian vawi hnih tlawmin vawi hnih an inhnehtawk bawk a ni. Hemi avang hian squad neih ṭhat tawk loh chungchang leh player thlak kual dan turte chu sawichhuah a ni thar leh a, tlar laili thuam chak nan Morgan Gibbs-White-a hmakhua thlengin ngaihtuahna an seng mek bawk a ni.

Fernandes hi season liam ta khan a che ṭha em em a, English top-flight season khata assist ngah ber record thar siamin vawi 21 lai assist a nei a, United chu Premier League-ah pathumna a nihpui a nih kha. Premier League Player of the Season, FWA Player of the Year leh a vawi nga nan record siamin Sir Matt Busby Player of the Year lawmman te a la fai vek bawk a ni.

Tun season-ah pawh bul an ṭan tirh lamah chuan a theihna a la lang chiang hle; Ipswich Town 5-2 a an sawp ṭum khan hat-trick siamin Bryan Mbeumo-a goal tur a siamsak bawk a, Everton an hneh loh hnuah Champions League-ah Sabah 4-0 a an sawp ṭumin goal a khung leh bawk a, mahse hemi hnu hian goal leh assist nei lovin match li chhung a hmang liam ta zawk a ni.

Portugal boss Jesus chuan Fernandes hi Pathiannia Nations League-a Norway an hmachhawn hunah hahchawlhtir a tum thu a sawi a, an match lehpek tur Denmark an tum hun atana a theihna dah ṭhat a thlang zawk a ni. Jesus chuan, "Amah hi ka hrechiang em em a, a hma pawhin ka lo enkawl tawh ṭhin a ni. Bruno hi engmah hlauhthawnawmah dah ka duh lo a, Denmark kan hmachhawn hunah fit ṭha taka a inlan theih ka duh zawk a ni," tiin a sawi bawk.

United lam pawhin ram tana a fehchhuah zawha an captain rawn let leh hunah a hliam a zual loh hram an beisei hle a. Tlarhma lama United beiseina kawltu ber a nih avangin, match khata an dinhmun ai mahin kar lo awm turtea Fernandes a dam chian theih nana uluk taka enkawl chu an ngai pawimawh ber rih a ni.