Manchester United striker hlui Louis Saha chuan tun dinhmuna Old Trafford club tana tlarhma (front three) ṭha ber tur a thlannaah Matheus Cunha leh Amad Diallo te chu a telh ve lo a ni.
2026-27 season bul an ṭan aṭang khan, Slovenian striker Benjamin Sesko-a'n a chawn ruh hliam a enkawl dam chhoh mek avangin head coach Michael Carrick chuan Brazil forward Matheus Cunha chu tlarhma laili (striker) ah a chhawr ber ṭhin a. Sesko hi Nilaini zana Carabao Cup-a Brighton laka 3-2 a an tlawm ṭum khan tun season-a a vawikhat nan bul a ṭan ve chauh a ni.
Red Devils-in season bul an ṭan ṭhat tawk loh avangin Carrick-a lakah sawiselna leh pressure a sang chho hle a. United-a a lo khelhpui ṭhin Louis Saha pawhin Carrick-a team dinhmun chungchanga a ngaihdan chu a rawn sawichhuak ve ta bawk a ni. Tun season kal mekah Carrick hian Marcus Rashford, Cunha leh Bryan Mbeumo te chu tlarhmaah a inkawptir tlangpui ṭhin a ni.
Saha hi January 2004 khan Fulham aṭangin Old Trafford a pan a, United tan season li chhung khelin Premier League match 12 a khelh hmasakah goal 7 ngawt a khung nghal a. France international hlui hian United-ah hian league title pahnih, Champions League nomawi pakhat leh League Cup telin trophy li lai a chawi hman a ni. Premier League-ah Fulham, United leh Everton tan goal khung thei tak a lo nih tawh ṭhin avangin attacking player chungchanga a ngaihdan hian ngaihven a hlawh hle.
Tun dinhmuna United squad zinga tlarhma player pathum ṭha ber tur Betano Sports Betting Site-in an zawhna chhangin Saha chuan, "Marcus Rashford, Benjamin Sesko leh Amad Diallo aiah Bryan Mbeumo a ni ang. Mbeumo ka thlan zawk chhan chu a kum a lo upa zawk tawh bakah goal khung kawngah record ṭha zawk a neih vang a ni," tiin a sawi.
Amad Diallo-a theihna pawh fak zuiin Saha chuan, "Amad hi winger pangngai anga khel thei a nih rualin playmaker ang pawhin a khel kawp thei a, mual sir aṭanga lutin thil danglam tak tak a ti thei a, hei hian Manchester United khelh dan hi tumpuite tan hriatthiam a tiharsa ṭhin a, chu chu ka duh zawng tak a ni.
"Amaherawhchu, Mbeumo hi a tlang (direct) zawk a. United hian khingpuite tlarhnung tlang zung zung thei midfielder an neih loh hunah chuan, tlang taka nawra goal khung thei turin Mbeumo-a tlan tlang theihna hi an mamawh a ni. Marcus Rashford pawhin chutiang chu a ti thei bawk," tiin a sawifiah a ni.
United hian tun season chhungin Rashford, Mbeumo leh Sesko te hi tlarhmaah bul an la ṭantir rual miah lo a. Pathiannia Premier League-a Fulham an hmachhawn hunah chuan he attacking trio hi Carrick-a'n a chhawr rual ve ngei beisei a ni.
Saha-a thlan chhuahah hian Cunha tan hmun a awm lo a, hei hian United tana a debut season-a game lian bika che ṭha thei em em Cunha hi hmachhawn tur lian tham zawk an neih hunah bul a ṭan ziah dawn em tih zawhna a chhuah phah hle bawk a ni.
