2026-27 season bul ṭan danah Manchester United chuan duhthusam an la pha chiah lo tih phat rual a ni lova, Manchester City laka 1-0 a an tlawm hnu phei kha chuan club chhungril leh fan-te rilru a hnual hle a ni. Mahse, result beisei ang la hmu chiah lo mah se, head coach Michael Carrick-a naute inkhelh dan phungah chuan thil duhawm leh chhinchhiah tlak hmuh tur a awm nual thung a. Old Trafford-a an lawmluh leh hnuah Marcus Rashford-a khelh dan chu United player zawng zawng zinga langsar ber pawl a tling hial a ni.
Rashford hian tun season-ah goal khung emaw assist nei emaw la nei rih lo mah se, khelmuala a chet dan leh a khelh dan phung tluangtlam tak erawh a ṭha thawkhat hle a, hei hi chhiarkawp (statistics) lam aṭang pawhin a chiang hle. 2025-26 season liam ta khan United hian bul ṭan fuh lo viau mah se season ṭha takah an chantir thei a nih kha. Tun 2026-27 season-ah pawh bul ṭan ṭha tawk chiah lo mah se, siamṭhat theih a la ni tih an pholang chho mek bawk a ni.
Tun season Premier League statistics-ah hian match li an khelh tawh aṭangin United hi expected goals (xG)-ah 8.29 neiin pahnihna dinhmun an luah mek a ni. United-in hetiang dinhmun an luah theihna chhan lian ber pakhat chu Rashford-a vang a ni a, squad chhungah amah aia chance siam hnem an awm lo. Football data lama mithiam StatmanDave-a'n a tarlan danin, tun season Premier League-ah United player zingah Rashford-a aia chance siam hnem an awm lova, amah hian vawi kua (9) lai chance a siam tawh a ni. Chu mai bakah, Rashford-a chance siam zawng zawngte hi set-piece tello, open play aṭanga a siam vek an la ni lehnghal.
Season liam ta khan Bruno Fernandes chuan Premier League season khata assist ngah ber record thar siamin PFA Player of the Year chawimawina a lo dawng tawh a nih kha. Chance siam leh thluak vawrh chhuah lamah kha chuan United squad chhungah Fernandes-a hnaihtu reng an awm lo va, Premier League pum huap pawhin a tlukpui an awm meuh lo a ni. Mahse tun season-ah erawh chuan a ṭhiante pet goal theih tur siamsak kawngah Fernandes-a tluk zetin Rashford hian pheikhai a khai rualpui thei tlat mai a, squad chhunga chance siam hnem ber an ni dun mek a ni.
United-a a rawn kir leh hnua Rashford-a'n goal a khung a, assist a neih hmasak ber chu hun rei lo teah a thleng ngei tura ngaih a ni a, chutiang a thlen hunah phei chuan a inrintawkna leh phurna chu nasa takin a pun belh ngei a rinawm bawk a ni.
