Manchester United defender hlui Brandon Williams chuan Rotherham United zawmin football tualzawlah a kir leh ta. February thlaa Hull City a chhuahsan aṭanga club nei lo a nih hnuah, he kum 26 mi hian League Two club Rotherham nen hian January 23, 2027 thleng daih tur thla thum contract a ziak a ni.
Williams hian Hull City-ah hun harsa tak hmangin match khat chiah a khel a, Blackburn Rovers laka 3-0 a an tlawm ṭumin second-half-ah a rawn inlan a ni. Pre-season aṭanga October laihawl thleng khan Rotherham hi a thlawnin a training pui a, in-fit chho zelin, Inrinni-a ASSEAL New York Stadium-a Shrewsbury Town an mikhual ṭum hian a debut a siam thei dawn a, jersey number 33 a ha dawn a ni.
Rotherham head coach Alex Bruce chuan Williams-a lakluh chungchang sawiin: "Contract hi a phu em em a ni. Pre-season aṭangin kan hnenah a thawkrim hle a, nitin rilru puitling leh inkhelh chakna nena tuihal takin a rawn inlan ṭhin a ni. Kum engemaw zat chhung hun harsa a lo hmang tawh a. Hlawh pawh la lova nitina rawn in-fit tura a inpehchhuah dan te, a lo thlen tawhna hmun leh a career liam ta te kan thlirin, a career ṭan thar lehna tur hunṭha ka pe thei hi ka hlim takzet a ni," tiin a sawi.
Alex Bruce chuan sawi zawmin, "Pre-season a rawn zawm tirh ai khan a taksa a hrisel in a lang ṭha tawh hle a. Hma sawn zelin football club tana player pawimawh tak a rawn nih zui ngei ka beisei," a ti bawk.
Rotherham United hi tun season ṭan tir aṭangin an che chhe hle a, League Two match 12 an khelh tawhah vawi hnih chauh hnehna la changin 22-na dinhmun an luah mek a ni. Thawhlehni khan mahni mualah Newport County 2-2 in an hnehtawk pui a, inelna hrang hrangah match pasarih a zawnin hnehna an la chang lo a ni. Hetiang dinhmun tlahniam mek hi puih in, Inrinni-a League Two match thum a zawna chak tawh Shrewsbury Town an hmachhawn hunah Williams hian dinhmun thlak danglam ngei a beisei a ni.
Williams hi Manchester United youth academy aṭanga rawn inzir chhuak a ni a. 2019/20 breakthrough season-ah match 36 inlanin goal khat a khung hman a nih kha. Mahse a season lehah minute a hmu tlem chho tial tial a, match 14 chauh a khel zui a ni. Hemi hnu hian Norwich City leh Ipswich Town-ah te loan-in a chhuak a, kum 2024 khan a contract a zawh avangin Old Trafford a chhuahsan ta a ni. Thla 12 chhung football a chawlhsan hnuin 2025 khan Hull City a zawm a, mahse thla riat liam ta khan he club hi a lo chhuahsan leh tawh a ni.
